छैठौं वर्षमा खबरकुरा

गणतन्त्र दिवसको ऐतिहासिक अवसर पारेर सुरु गरिएको संज्ञान मिडियाद्वारा सञ्चालित खबरकुरा डटकम आज पाँच वर्ष पार गरेर गौरबमय छैठौं वर्षमा प्रवेश गरेको छ । छैठौं वर्ष प्रवेशको यो अवसरमा सबैभन्दा पहिला हामी सबै आदरणीय पाठक, विज्ञापनदाता, शुभचिन्तकहरूप्रति हार्दिक कृतज्ञता प्रकट गर्न चाहन्छौं ।

यो यात्राको पाँच वर्ष केवल कालगणना मात्र होइन, चुनौतीहरूसँगको सतत जुधाइ, सीमित स्रोतसाधनमा गरिएको कठोर परिश्रम र सत्य–न्यायको पक्षमा निर्भीकतापूर्वक उभिने पत्रकारिताको आदर्श यात्राको साक्षी हो । पाँच वर्ष हाम्रा लागि केवल समयको हिसाब मात्र रहेन, संकट, संघर्ष र सकस पार गर्ने जीवित अनुभव पनि भयो । सीमित स्रोत, साधन र संरचनाबीच हामीले सूचना सम्प्रेषणको धर्मबाट कहिल्यै च्युत भएनौं । कहिले भ्रष्टाचारविरुद्धको कलम चलायौं, कहिले समाजमा गहिरिएको विकृति र विसंगति उजागर ग-यौं । जनसरोकारका हरेक विषयमा खबरकुराका हेडलाइन बनेका छन् । हाम्रा हरेक समाचार, विश्लेषण र अभिव्यक्तिहरूले सत्यको पक्ष लिने साहस बोक्दै आएकाछन् ।

सत्य बोल्नु, लेख्नु र सम्प्रेषण गर्नु यति सजिलो छैन, विशेषतः त्यस्तो समयमा जब सूचनालाई तोडमोड गर्ने, डर देखाउने र बिकाउने चलनले मूलधार मिडियालाई नै छोप्न खोजिरहेको छ । खबरकुराले सुरुदेखि नै यस्ता प्रवृतिहरूसँग भिन्न रहँदै पत्रकारितालाई जनमुखी, सत्यपक्षीय, सूचनामुखी र जिम्मेवार बनाउने कार्यमा मात्र आफूलाई समर्पित राख्दै आएको छ । पाँच वर्षको छोटो समयमै खबरकुरा डटकमले सामाजिक न्याय, लोकतान्त्रिक मूल्य, सुशासन र नागरिक सरोकारका मुद्दालाई प्राथमिकता दिँदै मोफसलमा समेत वैकल्पिक मिडियाको भरोसायोग्य स्वरूपमा स्थापित गर्न सकेको छ । कोरोना महामारीको बीचमा जन्मिएको खबरकुराले राजनीतिक अस्थिरता र आर्थिक संकटजस्ता कठिन क्षणहरूमा पनि निरन्तर जानकारी, विश्लेषण र चेतना सम्प्रेषणको कार्य रोकेको छैन । यही अडानले हामीलाई आम पाठकवर्गको विश्वास जित्न सफल भएको छ ।

पत्रकारिता केवल समाचार लेख्ने कर्म मात्र होइन, यो एक सामाजिक संवाद पनि हो । तपाईंहरूको सतत विश्वास, साथ, सुझाव र आलोचनाले नै खबरकुरालाई आजको उचाइमा ल्याउन सम्भव भएको हो । आलोचना–प्रतिक्रिया र सुझावप्रति हाम्रो सदैव खुला हृदय रहनेछ ।

अबको यात्रामा हामी अझै निखारिएर, तथ्य र तर्कमा आधारित सामग्री प्रस्तुत गर्ने एवं समावेशी दृष्टिकोण राख्ने संकल्प गर्दछौं । सत्यका पक्षमा उभिएको कलम कहिल्यै झुक्नेछैन, निष्पक्षताको आवाज कहिल्यै मर्ने छैन ।

अन्तमा, गणतन्त्र दिवसको शुभ अवसरमा हामी सम्पूर्ण नेपाली जनमानसमा सुख, शान्ति र समृद्धिको शुभकामना व्यक्त गर्दछौँ ।