नेपालगन्ज । बाँकेको बैजनाथबाट ठूलो परिमाणमा ब्राउन सुगरसहित नेपाली सेनाका जवान पक्राउ परेका छन् । बैजनाथ गाउँपालिका(२ घर भई हाल नेपाली सेनाको जग दल गण काठमाडौंमा कार्यरत सैनिक जवान २६ वर्षीय सन्जु आलेलाई प्रहरीले लागु औषध ब्राउन सुगर सहित पक्राउ गरेको हो ।
आज अपराह्न लागुऔषध नियन्त्रण ब्यूरो शाखा कार्यालय नेपालगन्जको टोली र इलाका प्रहरी कार्यालय बनकटुवाको संयुक्त टोलीले सन्जुलाई १० ग्राम ६२७ मिलिग्राम ब्राउन सुगरसहित पक्राउ गरेको बाँके प्रहरीले जानकारी दिएको छ ।
ब्राउन सुगरको कारोबार भइरहेको विशेष सूचनाका आधार ब्यूरोको टोलीसँगै रहेको बनकटुवा प्रहरीले सन्जुको घरभित्र रहेको जाँडको भाँडोमा राखिएको प्लास्टिक निकालेर तौल गर्दा १० ग्राम ६२७ मिलिग्राम ब्राउन सुगर फेला पारेपछि सैनिक जवान आलेलाई नियन्त्रणमा लिइएको ईलाका प्रहरी कार्यालय कोहलपुरकी प्रमुख डीएसपी लक्ष्मी खनालले बताइन् ।
सन्जुको साथबाट ब्यूरोको टोलीले ब्राउन सुगरसहित १ थान मोबाइल र नगद २ हजार रुपैयाँ बरामद गरेको प्रहरीले जानकारी दिएको छ भने पक्राउ परेका सन्जुलाई आबश्यक कारबाही तथा अनुसन्धानका लागि इलाका प्रहरी कार्यालय कोहलपुर पठाइएको जिल्ला प्रहरी कार्यालय बाँकेले जानकारी दिएको छ ।
प्रतिक्रिया