प्रचण्डले बोलाएको विपक्षी दलको बैठक सुरु

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले विपक्षी दलको बैठक माओवादी संसदीय दलको कार्यालयमा बोलाएका छन् । सत्तारुढ दलले उपसभामुख इन्दिरा रानालाई पदबाट हटाउन तयारी गरेको भनिएको अवस्थामा प्रचण्डले विपक्षी दलसँग छलफलका लागि बैठक आह्वान गरेका हुन् ।

बैठकमा माओवादी केन्द्रका अध्यक्ष प्रचण्डसहित वरिष्ठ उपाध्यक्ष नारायणकाजी श्रेष्ठ, प्रमुख सचेतक हितराज पाण्डे, रास्वपाका कार्यवाहक अध्यक्ष डीपी अर्याल, प्रमुख सचेतक सन्तोष परियार सहभागी छन् । त्यस्तै, राप्रपाका नेता बुद्धिमान तामाङ र ध्रुवबहादुर प्रधान, नेकपा एकीकृत समाजवादीका वरिष्ठ उपाध्यक्ष राजेन्द्र पाण्डे र नेता शेरबहादुर कुँवर, नेसपाका महिन्द्र राय यादव तथा आजपाका अध्यक्ष प्रभु साह बैठकमा उपस्थित छन् ।

प्रतिपक्षमा रहेका नाउपा र जसपा नेपाल भने सत्तापक्षको छलफलमा सहभागी भएका छन् । यसअघि कांग्रेस र एमालेका सांसदहरूले उपसभामुख रानालाई पदबाट हटाउनका लागि हस्ताक्षर गरिसकेका छन् । हाल उपसभामुख इन्दिरा राना अमेरिकामा छन् ।