संघीय संसदका पाँच समितिको बैठक आज, विभिन्न विधेयक र प्रतिवेदनमाथि छलफल

काठमाडौं । संघीय संसद अन्तर्गतका पाँचवटा संसदीय समितिको बैठक बुधबार बस्दै छन् । सिंहदरबारस्थित आ-आफ्नै बैठक कक्षमा बिहान ८ बजेदेखि दिउँसो सवा १२ बजेसम्म बैठकहरू बस्ने कार्यक्रम छ ।

अन्तर्राष्ट्रिय सम्बन्ध तथा पर्यटन समितिको बैठकमा हवाई तथा उड्डयन सुरक्षासम्बन्धी विषयमा कानूनविदहरूसँग छलफल हुने कार्यसूची छ । अर्थ समितिको बैठकमा वैकल्पिक विकास वित्त परिचालनका सम्बन्धमा व्यवस्था गर्न बनेको विधेयकको प्रतिवेदनमाथि थप छलफल गरिनेछ ।

संघीयता सबलीकरण तथा राष्ट्रिय सरोकार समितिले आर्थिक वर्ष २०८१/८२ को वार्षिक प्रतिवेदन र आर्थिक वर्ष २०८२/८३ को वार्षिक कार्ययोजनाको मस्यौदामाथि छलफल गर्ने तयारी गरेको छ ।

यसैगरी, सार्वजनिक नीति तथा प्रत्यायोजित विधायन समितिको बैठकमा ज्येष्ठ नागरिकको जीवन सुरक्षित, गुणस्तरयुक्त र सम्मानित बनाउन थप विशेष व्यवस्था गर्नुपर्ने विषयमा सम्बन्धित मन्त्रीसँग छलफल हुनेछ ।

विधायन व्यवस्थापन समितिको बैठकमा भने संघीय निजामती सेवा विधेयक, २०८० माथि दफावार छलफल गरिने कार्यक्रम छ ।