काठमाडौं । विप्लव नेतृत्वको नेकपाले पूर्वप्रधानन्यायाधीश सुशीला कार्की नेतृत्वको सरकारलाई ‘विद्रोह जेन–जीको तर सरकार जेन–एक्सको’ भएको टिप्पणी गरेको छ ।
नेकपाका महासचिव नेत्रविक्रम चन्द (विप्लव)ले आज एकसाथ बिज्ञप्ति र भिडियो सन्देश जारी गर्दै सरकारको बनोटप्रति विरोध जनाएका छन् ।
उनले नागरिकहरुको प्रतीक्षालाई चिर्दै पूर्वप्रधानन्यायाधीश सुशीला कार्कीको नेतृत्वमा अन्तरिम सरकार निर्माण भएपनि सरकारको निर्माण जेन जी र जनताको अपेक्षा विपरीत बन्न पुगेको बताएका छन् ।
‘विद्रोह जेनजीको सरकार जेन एक्सको भएको छ । हाम्रो पार्टी यो सरकारको बनोटप्रति विरोध दर्ज गर्दै गम्भीरतापूर्वक नियाल्ने निष्कर्षमा पुगेको छ ।’ उनले भनेका छन् ।
आन्दोलनरत शक्ति, नागरिक समाज, संघर्षरत राजनीतिक शक्ति सम्मिलित सर्वपक्षीय अन्तरिम सरकार बन्नुपर्छ भन्ने पार्टीको सुझाव पुगे पनि जिम्मेवार निकायबाट यसलाई जानाजान बेवास्ता गरिएको विप्लवले बताएका छन् । उनले वर्तमान सरकारलाई राजनीतिक दल र जनताले यसलाई नस्वीकार्ने पनि बताएका छन् ।
विप्लवले सरकार गठनमा गैरदलीय, गैर वामपन्थी सोचले काम गरेको बताउँदै भनेका छन्,-‘कसको दबाब वा इसारामा यो गरियो ? विषय रहस्यपूर्ण छ,’
उनले अहिले सरकार र मन्त्रीमण्डल मात्र नभई राज्यको पुनर्संरचना र संविधानको पुनर्लेखन चाहिएको बताएका छन् ।
‘पुरानो राज्य प्रणालीलाई यथावत राखेर यसको निकास सम्भव छैन । तसर्थ आदरणीय जनसमुदायमा हाम्रो विशेष अपिल छ कि राज्यलाई अग्रगामी रुपान्तरण गर्नका लागि समयमै सचेत बनौं,’ विप्लवले भनेका छन्, ‘देशका सामु खडा भएका राष्ट्रिय स्वाधिनताको विशेष चुनौतिलाई गम्भीरतापूर्वक आत्मसाथ गरौं ।’
प्रतिक्रिया