काठमाडौं । माओवादी युवा नेता राजन दाहालले नेत्र विक्रम चन्द ‘विप्लव’लाई लक्षित गर्दै तीव्र प्रश्नवाण प्रहार गरेका छन् ।
सामाजिक सञ्जालमार्फत दाहालले विप्लव पक्षको हालको राजनीतिक दिशालाई प्रश्न गर्दै पार्टी विभाजनदेखि लिएर वैचारिक र संगठनात्मक विचलनसम्मका विषयमा कठोर टिप्पणी गरेका हुन् ।
दाहालले लेखेका छन्, “अन्ततः यही बाटोमा आउनु थियो भने जनविश्वास आर्जन गरेको एकताबद्ध र मजबूत केन्द्रीकरण भएको पार्टी किन विभाजित गरेको ? नेता, कार्यकर्ता र जनताको मनोविज्ञान किन विभाजित गरेको ? श्रद्धेय अध्यक्ष कमरेड प्रचण्ड लगायत माओवादी नेताहरूलाई मार्न बम किन बिछ्याएको ?”
उनले विप्लव पक्षले अघिल्ला वर्षहरूमा माओवादी केन्द्रविरुद्ध गरेको राजनीतिक कार्यशैली र व्यवहारलाई पनि आलोचना गरेका छन् । “अरू पार्टीलाई भोट हाल्न लगाएर माओवादीलाई किन हराउन लागियो ? आफ्नै पार्टीको केन्द्रीय समितिको बहुमत निर्णय अस्वीकार गरी लेनिनवादी संगठनात्मक पद्दति तोड्दा नेकपा बहुमत बनाउनु पर्ने बाध्यता किन सिर्जना भयो ?” दाहालले प्रश्न उठाएका छन् ।
उनका अनुसार अहिले फेरि माओवादीसँग पुनः नजिकिने संकेत देखिँदै गर्दा विगतका गल्तीहरूको आत्मसमीक्षा अपरिहार्य छ । उनले लेखेका छन्, “वार्ता टोलीमा नाम र चुनाव चिन्हका बारेमा छलफल र निष्कर्षमा पुग्न लाग्दा छलफलमै आएको नाम लिएर निर्वाचन आयोगमा दल दर्ता किन गरियो ? यहीबीचमा दर्जनौं पटक राजावादीहरूसँग गोप्य वार्तामा बस्नुको कारण के हो ?”
दाहालले इतिहासप्रति न्याय गर्नका लागि आत्मसमीक्षा र कमजोरीको स्वीकारोक्ति आवश्यक रहेको उल्लेख गरेका छन् । “इतिहास प्रति न्याय गर्न पनि आत्मसमिक्षा र कमजोरीको स्वीकारोक्ति त गर्नु पर्ला नि,” उनले लेखेका छन् ।
राजन दाहालको उक्त अभिव्यक्तिलाई राजनीतिक वृत्तमा विप्लव समूहको पछिल्लो गतिविधि र माओवादीसँग सम्भावित एकताका संकेतसँग जोडेर हेरिएको छ । दाहाल माओवादी भित्रका ती युवा नेतामध्ये एक हुन्, जसले संगठनभित्र वैचारिक स्पष्टता र एकता आवश्यक रहेको धारणा राख्दै आएका छन् ।
प्रतिक्रिया