काठमाडौं । भदौ २४ गतेको असामान्य परिस्थितिको मौका छोपी इमाडोलस्थित प्रहरी प्रभागमा तोडफोड र आगजनी गरी लुटपाटसमेत गरेको आरोपमा पाँच जना पक्राउ परेका छन् ।
प्रहरीका अनुसार पक्राउ परेकाले प्रहरी पोशाक, व्यक्तिगत सामान र गरगहना चोरी गरेका थिए । पक्राउ परेकाविरुद्ध आपराधिक उपद्रव, चोरी तथा संगठित अपराध मुद्दा दर्ता गरी जिल्ला प्रहरी परिसर ललितपुरले थप अनुसन्धान अघि बढाइरहेको जनाएको छ ।
पक्राउ पर्नेमा काभ्रे घर भई ललितपुर महालक्ष्मी-८ लुभु बस्ने २० वर्षीय कुमार तामाङ, धनकुटा पाख्रिबास घर भई लुभु बस्ने २२ वर्षीय गोकर्ण राई, रामेछाप घर भई लुभु बस्ने २० वर्षीय कृष्णराज गिरी, उदयपुर घर भई इमाडोल बस्ने ३१ वर्षीय सुनिलकुमार बस्नेत र सोलुखुम्बु घर भई लुभु बस्ने २२ वर्षीय सरोज नेपाली रहेका छन् । यस्तै, सिन्धुली घर भई इमाडोल बस्ने २१ वर्षीय नरेश तामाङलाई पनि नियन्त्रणमा लिइएको प्रहरीले जनाएको छ ।
पक्राउ परेकासँगै प्रहरीको पोशाकसँग सम्बन्धित सामग्रीहरू-बुट १ जोर, तिलहरी १ थान, झुम्का १ जोर र मंगलसुत्र १ थान बरामद गरिएको छ ।
प्रतिक्रिया