काठमाडौं । आईसीसी टी-२० विश्वकप एसिया तथा इस्ट एसिया-प्यासिफिक छनोटको तयारीमा रहेको नेपाली राष्ट्रिय क्रिकेट टोलीले दोस्रो अभ्यास खेलमा कतारलाई १६ रनले पराजित गरेको छ ।
ओमानको मस्कटस्थित ओमान क्रिकेट एकेडेमी ग्राउण्ड टर्फ-२ मा सोमबार सम्पन्न खेलमा नेपालले टस जितेर पहिले ब्याटिङ गर्दै २० ओभरमा सात विकेट गुमाएर १७० रन बनाएको थियो ।
लक्ष्य पछ्याउने क्रममा कतारले निर्धारित २० ओभरमा छ विकेटको क्षतिमा १५४ रन मात्र बनाउन सक्यो ।
कतारका मोहम्मद तनबिरले ३७ बलमा तीन चौका र दुई छक्कासहित ५१ रन, मिर्जा मोहम्मद बेगले २७ बलमा चार छक्कासहित ४० रन, र मोहम्मद असिमले ३० रनको योगदान दिए ।
नेपालका तर्फबाट करण केसीले तीन विकेट लिए भने दीपेन्द्रसिंह ऐरी, ललित नारायण राजवंशी र नन्दन यादवले समान एक-एक विकेट हात पारे ।
यसअघि ब्याटिङमा उत्रिएको नेपालका लागि कुशल भुर्तेलले उत्कृष्ट प्रदर्शन गर्दै ३३ बलमा ५६ रनको अर्धशतकीय योगदान गरे । त्यस्तै, दीपेन्द्रसिंह ऐरीले २१ बलमा एक चौका र तीन छक्कासहित ३८ रन, र कुशल मल्लले २९ बलमा एक चौका र दुई छक्कासहित ३८ रनमा अविजित रहे ।
अन्य खेलाडीहरूमा आरिफ शेखले १३, ओपनर आसिफ शेखले ११ र कप्तान रोहित पौडेलले ८ रन जोडे । कतारका लागि शरिक मुनिर र मोहम्मद इक्रामउल्लाहले समान दुई-दुई विकेट लिए ।
यसअघि नेपालले पहिलो अभ्यास खेलमा ओमानलाई हराउँदै विजयी सुरुवात गरेको थियो । अभ्यास खेलहरूमार्फत नेपालले आगामी टी-२० विश्वकप एसिया छनोटका लागि अन्तिम तयारी गरिरहेको छ ।
प्रतिक्रिया