नेपालगन्ज । पटक पटकको सूचनालाई स्थानीयले अटेर गरेपछि नेपालगन्ज उपमहानगरपालिकाले सडकपेटी कब्जा गरी बनाइएका संरचना हटाउन डोजर परिचलन गरेको छ । प्रारम्भिक चरणमा वीपी चोकदेखि धम्बोझी चोकसम्मको अवैध संरचना हटाउन डोजर परिचालन गरिएको नेपालगन्ज उपमहानगरपालिकाले जनाएको छ ।
नगर प्रमुख प्रशान्त विष्ट र उपप्रमुख कमरुद्धिन राई दुबैजनाको उपस्थितीमा अतिक्रमित संरचना हटाउन डोजर चालाइएको छ । पटक(पटक सार्वजनिक सूचना जारी गरेर सचेत गराउँदा समेत स्थानीयले अवैध संरचना नहटाइएपछि डोजर लगाएर संरचना हटाउन थालिएको नगरप्रमुख विष्टले बताए ।
विष्टले नगरको मुख्य सडक सुर्खेतरोडको पश्चिमतर्फ नालादेखि ७ फिट फुटपाथ ‘क्लियर’ गरी ग्रीनरी र अपांगमैत्री सडक निर्माण गर्ने योजना रहेको सुनाए ।
नगर प्रमुख विष्टले यसपछि क्रमशः धम्बोझी चोकदेखि पुष्पलाल चोकसम्म र गणेशमान चोकदेखि वीपी चोकसम्मको फुटपाथ क्षेत्र पनि ‘क्लियर’ गरिने स्पष्ट पारे ।
ग्रीनरी र अपांगमैत्री सडक निर्माणका लागि ठेकेदार कम्पनीसंग ठेक्का सम्झौता समेत भइसकेको नेपालगन्ज उपमहानगरका प्रमुख प्रशासकीय अधिकृत रामहरि शर्माले जानकारी दिए । उपमहानगरले नेपाल प्रहरी र नगर प्रहरीको बाक्लो उपस्थितिमा डोजर चलाइएको छ ।
उता उपमहानगरको कदमलाई नेपालगन्जका वरिष्ठ पत्रकार पुर्णलाल चुकेले वर्षैपिच्छे नयाँ नियम बनाएर व्यक्तिगत सम्पत्ति माथि बिना मुआब्जा कब्जा गर्न पाइने कुन नियममा छ ? भन्दै प्रश्न उठाएका छन् । उनले वर्षौदेखि सडक छेउको नालामा रहेको धक्कन समेत व्यवस्थित गर्न नसकेर सडकमै एम्बुस थापेको जस्तोबनाएको उपमहानगर र सडक विभागले फुटपाथको लागि भनेर नालीको भित्री किनारबाट ७ फुट छोड्ने उर्दी जारी गरेको समेत टिप्पणी गरेका छन् ।
प्रतिक्रिया