आजबाट आइसीपी नेपालगन्जमा मूल्यांकन डाटाबेस प्रणाली संचालन

नेपालगन्ज । आइसीपी नेपालगन्जमा आजबाट मूल्यांकन डाटाबेस प्रणाली संचालनमा ल्याइएको छ । मूल्यांकन डाटाबेस प्रणालीको आज एक कार्यक्रमका बीच अर्थमन्त्री रामेश्वर खनालले शुभारम्भ गरे । विराटनगर, बीरगन्ज र भैरहवा भन्सारपछि नेपालगन्जमा यो प्रणाली लागु गरिएको हो ।

प्रणाली शुभारम्भ गर्दै अर्थमन्त्री खनालले मूल्यांकन डाटाबेस प्रणाली सञ्चालन गरिएपछि अवाञ्छित क्रियाकलाप रोकिने र व्यवसायको लागत घटाउनुका साथै पारदर्शी कार्य सम्पादन हुने बताए । उनले प्रणाली लागु भएपछि अन्तर्राष्ट्रिय अभ्यासबाट नेपाल पनि विमुख नहुने बताए ।

कार्यक्रममा राजश्व सचिव भूपाल बरालले भन्सार प्रणालीमा सुधारका लागि व्यवसायीको मागबमोजिम ‘डाटा’ प्रणाली लागू गरिएको बताए । “जोखिम सबै प्रणालीमा हुन्छ र यसमा पनि जोखिम छ, तर यो प्रणाली वैज्ञानिक र पारदर्शी छ । यसबाट पक्कै पनि लाभ प्राप्त हुनेछ”, उनले भने,“सुशासन कायम गर्ने दायित्व नीजि क्षेत्र र सरकार दुवैको हो । वैध व्यापारलाई प्रोत्साहन गर्नु सबैको दायित्व हो । यसमा प्रविधिको प्रयोग र सहकार्यको नीति अवलम्ब गरौँ ।”

भन्सार विभागका महानिर्देशक श्यामप्रसाद भण्डारीले भन्सार चुहावट रोक्न स्थानीय प्रशासनसँग सहकार्य अगाडि बढाइएको भन्दै आज शुभारम्भ भएको ‘डाटावेस’ प्रणाली अन्तरराष्ट्रिय अभ्यासपछि नेपालमा पनि लागू गरिएको बताए । “यस प्रणालीले भन्सार महसूल छलीलाई नियन्त्रण गरी राजश्व वृद्धि गर्न, मूल्याङकन जोखिम सहजै पत्ता लगाई राजश्व चुहावट रोक्न मद्दत गर्नेछ”, उनले भने,“साथै कम वा बढी मूल्य पत्ता लगाई सम्पत्ति शुद्धीकरण नियन्त्रणलाई टेवा पु¥याउन, भन्सार मूल्याङ्कनमा निष्पक्ष, पारदर्शिता र एकरुपता निर्धारणलगायत काम गर्न यो प्रणाली आवश्यक भएको हो ।”

पश्चिमको दौडाहामा निस्केका अर्थमन्त्री खनालले आजै कोहलपुर स्थित राजश्व कार्यालय, नेपालगन्जको आन्तरिक राजश्व, कोललेनिकाको पनि अनुगमन गरेका थिए ।