नेपालगन्ज । नेपाल पत्रकार महासंघ बाँके शाखाको आयोजनामा रक्तदान गरिएको छ । आज गरिको रक्तदान कार्यक्रममा ३० जना दाताले रगत दान गरेका छन् ।
नेपाल रेडक्रस सोसाइटी प्रादेशीक रक्तसञ्चार सेवा केन्द्र नेपालगन्जको प्राविधिक सहयोगमा रक्तदान कार्यक्रम गरिएको हो । नेपाल पत्रकार महासंघ लुम्बिनी प्रदेश अध्यक्ष शुक्रऋषि चौलागाई र बाँके शाखा अध्यक्ष नवीन गिरीले प्रादेशिक रक्तसञ्चार सेवा केन्द्रका बरिष्ठ प्राविधिक अधिकृत उपेन्द्र रेग्मीलाई संयुक्तरुपमा रगत संकलन गर्ने ब्याग हस्तान्तरण गर्दै रक्तदान कार्यक्रमको शुभारम्भ गरेका थिए ।
रक्तदान गर्नेहरुलाई प्रमाणपत्र वितरण गरिएको जनाउँदै महासंका बाँके सचिव कृष्ण ओलीले कार्यक्रममा प्राविधिक सहयोग गरेको रक्तसञ्चार केन्द्रलाई कदरपत्र प्रदान गरिएको जानकारी दिए । उनका अनुसाररक्तसञ्चार केन्द्रले पनि बाँके शाखालाई प्रशंसा(पत्र प्रदान गरेको थियो ।
त्यस अवसरमा १०६ पटक रक्तदान गरेका पत्रकार पवन जयसवाललाई सम्मान गरिएको थियो । नेपाल पत्रकार महासंघ बाँके शाखाले जयसवाललाई सम्मान गरेको हो । नेपाल पत्रकार महासंघ लुम्बिनी प्रदेश अध्यक्ष चौलागाई, बाँके शाखा अध्यक्ष गिरी लगायतले जयसवाललाई दोसल्ला, अबिर र माला लगाई सम्मानपत्रसहित सम्मान गरेका हुन् ।
नेपालगन्ज १९ निवासी जयसवालले बर्षौंदेखि रक्तदान जस्तो पवित्र कार्य गर्दै मानव सेवा र कल्याणका लागि खेल्दै आएको भूमिकाको उच्च कदर गर्दै सम्मान गरिएको शाखा अध्यक्ष गिरीले बताए । नेपालगन्ज क्षेत्रमा बढ्दो रगतको मागलाई मध्यनजर गर्दै सामाजिक उत्तरदायित्व अन्तर्गत रक्तदान कार्यक्रम गरिएको अध्यक्ष गिरीले जनाए ।
प्रतिक्रिया