काठमाडौं । आगामी प्रतिनिधिसभा सदस्य निर्वाचनलाई लक्षित गर्दै नेपाल प्रहरीले ठूलो संख्यामा निर्वाचन प्रहरी भर्ना गर्ने भएको छ । नेपाल प्रहरी प्रधान कार्यालय, मानवस्रोत विकास विभागअन्तर्गत भर्ना छनोट शाखाले बिहीबार सूचना प्रकाशित गर्दै १ लाख ३३ हजार ९८० जना निर्वाचन प्रहरी खुला प्रतिस्पर्धाबाट भर्ना गर्ने जनाएको हो ।
सूचनाअनुसार निर्वाचन प्रहरी पदका लागि योग्यता पुगेका नेपाली नागरिकबाट दरखास्त आह्वान गरिएको छ । इच्छुक उम्मेदवारहरूले २०८२ पुस २५ गतेदेखि माघ १ गतेसम्म सम्बन्धित जिल्ला प्रहरी कार्यालय तथा काठमाडौं उपत्यकाका जिल्ला प्रहरी परिसर काठमाडौं, ललितपुर र भक्तपुरमा दरखास्त बुझाउन सक्नेछन् । दरखास्त बुझाउने समय बिहान १० बजेदेखि दिउँसो ४ बजेसम्म तोकिएको छ ।
निर्वाचन प्रहरीमा भर्ना हुन उम्मेदवार नेपाली नागरिक हुनुपर्नेछ । साथै सामान्य लेखपढ गर्न जान्ने, कुनै नैतिक पतन देखिने फौजदारी अभियोगमा सजाय नपाएको, कुनै पनि राजनीतिक दलको सदस्य नभएको र शारीरिक तथा मानसिक रूपमा स्वस्थ हुनुपर्ने मापदण्ड तय गरिएको छ । उमेर हद दरखास्त दिने अन्तिम मितिसम्म कम्तीमा १८ वर्ष पूरा भई ४५ वर्ष ननाघेको हुनुपर्ने उल्लेख गरिएको छ ।
नेपाल प्रहरीले निर्वाचन अवधिभर मतदान केन्द्रको सुरक्षा, मतदाता र कर्मचारीको सुरक्षासहित शान्तिपूर्ण, निष्पक्ष र भयरहित निर्वाचन सम्पन्न गराउने उद्देश्यले निर्वाचन प्रहरी भर्ना गर्न लागेको जनाएको छ । भर्ना भएका निर्वाचन प्रहरीलाई आवश्यक तालिम दिएर तोकिएका मतदान केन्द्र तथा संवेदनशील क्षेत्रमा परिचालन गरिनेछ ।
भर्ना सम्बन्धी विस्तृत जानकारी, आवश्यक कागजात र छनोट प्रक्रियाबारे सम्बन्धित प्रहरी कार्यालय वा नेपाल प्रहरीको आधिकारिक सूचनामार्फत जानकारी लिन सकिने प्रहरीले जनाएको छ ।
हेर्नुहोस सुचना
प्रतिक्रिया