विध्वंस, अराजकता र आतंकका अगाडि झुक्नु कायरता हो : शंकर पोखरेल

काठमाडौं । नेकपा एमालेका महासचिव शंकर पोखरेलले वर्तमान राजनीतिक अवस्थालाई संकेत गर्दै संविधान, लोकतन्त्र र राष्ट्रको भविष्य नै संकटमा परेको घडीमा ‘उत्सव’ मनाउने प्रवृत्तिमाथि प्रश्न उठाएका छन्।

सामाजिक सञ्जालमा स्टाटस लेख्दै उनले यस्ता अवस्थासँग जोडिएको राजनीतिक संवेदनशीलताका बीच उत्सवमय गतिविधि उपयुक्त नहुने संकेत गरेका छन्।

पोखरेलले भूराजनीतिक स्वार्थका अगाडि लम्सार पर्नु दासता भएको उल्लेख गर्दै त्यस्ता स्वार्थका विरुद्ध आवाज उठाउनु स्वाभिमानको अभिव्यक्ति हुने बताएका छन्। उनका अनुसार विध्वंस, अराजकता र आतंकका अगाडि झुक्नु कायरता हो भने त्यसका विरुद्ध उभिएर जनताको मनोबल ऊर्जावान बनाउनु नै साहस हो।

“संविधान, लोकतन्त्र र राष्ट्रको भविष्य नै संकटमा परेको बेला, जन–जनको हृदय जलिरहेको घडीमा उत्सव कसरी मनाउन सकिन्छ ?” पोखरेलले प्रश्न गर्दै भनेका छन्, देश जलिरहेको बेला उत्सव मनाउन नसक्नेहरू कसै-कसैले ‘दास’का रूपमा हेरे पनि यिनै व्यक्तिहरू आजको समयका ‘स्पार्टाकस’ बन्न सक्नेछन्।

उनका अनुसार स्वतन्त्रता, स्वाधीनता र स्वाभिमानको झण्डा बोकेर अघि बढ्ने शक्ति नै आधुनिक विश्वव्यवस्थाको नयाँ आधारशिला निर्माण गर्नेछ।

पोखरेलको यो अभिव्यक्तिलाई पछिल्ला राजनीतिक टिप्पणी र बहससँग जोडेर व्याख्या गरिँदै आएको छ। कांग्रेस महामन्त्री गगन थापाले आइतबार विशेष महाधिवेशनलाई सम्बोधन गर्दै कांग्रेस दासहरुको पार्टी नभएको भन्दै पार्टीमा कोही बाहरु नरहेको बताएका थिए ।