काठमाडौं । नेपाली कांग्रेसभित्र पछिल्ला दिनमा तीव्र बनेको आन्तरिक विवादका बीच आज पार्टीको केन्द्रीय समिति बैठक सुरू हुन लागेको छ।
बुधबार बिहान ८ बजे सानेपास्थित केन्द्रीय कार्यालयमा बोलाइएको बैठक झण्डै दुई घण्टा ढिलाइपछि सुरू हुन लागेको हो। बैठकमा सहभागी हुन नेताहरू सानेपा पुगेका छन् ।
भृकुटीमण्डपमा विशेष महाधिवेशन पक्षधरहरु नयाँ नेतृत्व चयनतर्फ अघि बढेपछि संस्थापन पक्षले मंगलबार बिहान ११ बजेका लागि केन्द्रीय केन्द्रीय कार्यसमिति बैठक बोलाएको थियो। तर, निरन्तर सर्दै बैठक आज बिहान ८ बजेसम्मका लागि स्थगित भएको थियो । यसबीच पार्टीलाई विभाजनबाट जोगाउने प्रयासस्वरुप संस्थापन पक्ष र विशेष महाधिवेशन पक्षधरहरुबीच चरण चरणमा वार्ता र छलफल पनि भएको छ ।
आज बिहान सभापति शेरबहादुर देउवा र महामन्त्रीद्वय गगन थापा एवं विश्वप्रकाश शर्माबीच छलफल भएको छ । छलफलका क्रममा सभापति देउवाले निर्वाचन आयोगमा टिकट वितरण गर्ने कागजमा समेत आफुले हस्ताक्षर नगर्ने वचन महामन्त्रीहरुलाई दिएका छन् । यद्यपी, सभापतिले तत्कालै राजीनामा दिनुपर्ने या सम्पूर्ण कामबाट निस्कृय बन्नुपर्ने महामन्त्रीहरुको अडान कायमै छ ।
संवादले सौहार्दपूर्ण सहमति सिर्जना गर्न नसकेको कांग्रेस नेताहरूले बताएका छन्। त्यसैले संस्थापन पक्ष र विशेष महाधिवेशन पक्षबीच थप संवादको सम्भावना अन्योलमा रहेको आकलन पार्टीभित्रैबाट गरिएको छ।
यसबीच विशेष महाधिवेशन पक्षले आजको केन्द्रीय समिति बैठकमा सहभागी नहुने स्पष्ट गरिसकेको छ।
प्रतिक्रिया