बुटवल । निर्वाचनको मिति नजिकिँदै जाँदा उम्मेदवारहरूको घरदैलो र मतदाता भेटघाट अभियान तीव्र बन्दै गएको छ । पूर्व उपप्रधान तथा अर्थमन्त्री एवं नेकपा एमाले रुपन्देही क्षेत्र नं. २ का उम्मेदवार विष्णु प्रसाद पौडेलले मंगलबार तिलोत्तमा नगरपालिका वडा नं. ५ मा घरदैलो कार्यक्रम सञ्चालन गरेका छन् ।
मंगलबार बिहानैदेखि मतदाताको घरघरमा पुगेका उम्मेदवार पौडेलले स्थानीयसँग प्रत्यक्ष संवाद गर्दै सुझाव लिएका थिए । यसअघि सोही क्षेत्रबाट निर्वाचित भई अर्थमन्त्रीको जिम्मेवारी सम्हालिसकेका उनले रुपन्देहीको विकासमा आफ्नो योगदान रहेको उल्लेख गर्दै आगामी योजनाबारे पनि मतदातालाई जानकारी गराएका थिए । घरदैलोका क्रममा अधिकांश मतदाताले उनको विकास कार्यप्रति सकारात्मक प्रतिक्रिया दिएका थिए ।
घरदैलो अभियानका क्रममा पौडेलले मन्दिर, विद्यालय तथा विभिन्न संघसंस्थामा समेत पुगेर भेटघाट गरेका थिए । उनले श्री सरस्वती पञ्चायतन मन्दिर वैदिकाश्रममा दर्शन गर्नुका साथै बटुकहरूबाट टीका ग्रहण गरेका थिए । मणिग्राममा एक युवाले फूल प्रदान गर्दै अग्रिम विजयको शुभकामना दिएका थिए ।
तिलोत्तमा नगरपालिका वडा नं. ५ का संयोजक कृष्णप्रसाद भट्टराईका अनुसार युवा पुस्ता देशको भविष्यप्रति सचेत रहेको र पुनः एकपटक पौडेललाई विजयी गराउने अभियानमा सक्रिय रूपमा लागेका छन् । रुपन्देही निर्वाचन परिचालन समितिको आयोजनामा सुरु गरिएको यो दोस्रो चरणको घरदैलो अभियान रहेको उनले जानकारी दिए ।
मंगलबार नै तिलोत्तमा नगरपालिका वडा नं. ६ मा पनि घरदैलो कार्यक्रम तय गरिएको छ । बुटवल उपमहानगरपालिका, तिलोत्तमा र सैनामैना नगरपालिका समेटिएको रुपन्देही क्षेत्र नं. २ मा पौडेलले दैनिक रूपमा मतदातासँग प्रत्यक्ष भेटघाट गर्दै आफ्ना प्रतिबद्धता सुनाइरहेका छन् । कतिपय स्थानमा सवारी साधन प्रयोग गर्दै तथा कतिपय स्थानमा पैदलै हिँडेर मतदातासँग भेटघाट अभियानलाई निरन्तरता दिइएको छ ।
प्रतिक्रिया