बुटवल । नेकपा एमालेका उपाध्यक्ष विष्णुप्रसाद पौडेलले बुटवल र सैनामैनाका विभिन्न दल परित्याग गरेका साढे ३ सयभन्दा बढी कार्यकर्तालाई एमालेमा प्रवेश गराएका छन् । शुक्रबार बिहान बुटवल उपमहानगरपालिका-१२ र १३ बाट तथा दिउँसो सैनामैनाका विभिन्न वडाबाट उनीहरूलाई पार्टीमा प्रवेश गराइएको एमाले रुपन्देहीका जिल्ला उपसचिव बाबुराम पन्थीले जानकारी दिए ।
सैनामैना क्षेत्रबाट मात्रै करिब ३ सय जनाको प्रवेश कार्यक्रम वडा नं १ शाखा कमिटीका उपाध्यक्ष चक्र शाहीको संयोजनमा सम्पन्न भएको थियो । शाहीका अनुसार राष्ट्रिय स्वतन्त्र पार्टी (रास्वपा), नेकपासहित विभिन्न दलमा आवद्ध रहेका कार्यकर्ताहरू एमालेप्रति विश्वास व्यक्त गर्दै पार्टी प्रवेश गरेका हुन् ।
उनले एमाले भूमिहीन र लालपुर्जाविहीन नागरिकको भरोसाको पार्टी बनेको उल्लेख गर्दै नयाँ पुस्ताका युवासमेत भ्रम त्यागेर पार्टीमा जोडिएको बताए । “आज प्रवेश गरेका कार्यकर्ताको भावना बुझेर पार्टी नेतृत्वले उचित जिम्मेवारी दिई सक्रिय बनाउने विश्वास लिएका छौं,” उनले भने ।
नवप्रवेशीलाई स्वागत गर्दै उपाध्यक्ष पौडेलले विभिन्न हल्ला र भ्रमका कारण पार्टी बाहिर रहेका व्यक्तिहरू पुनः एमालेमा फर्किनु सकारात्मक संकेत भएको बताए । “यहाँ उपस्थित जेनजीदेखि अनुभवी पुस्तासम्मले एमालेप्रति भरोसा देखाउनुभएको छ । हामी तपाईंहरूको भावना र अपेक्षाअनुसार काम गर्नेछौं,” उनले भने ।
कार्यक्रममा एमाले लुम्बिनी प्रदेश उपाध्यक्ष तथा रुपन्देही-२ निर्वाचन परिचालन कमिटी संयोजक भोजप्रसाद श्रेष्ठले जनताको सुझाव र अपेक्षाअनुसार पार्टीले काम गर्ने प्रतिबद्धता जनाए । उनले स्थानीय तहका समस्या तत्कालै पार्टीसमक्ष राख्न पनि आग्रह गरे ।
त्यसैगरी, एमाले बुटवलका अध्यक्ष शोभाखर पोखरेलका अनुसार शुक्रबार नै बुटवल-१२ बाट पनि दर्जनौं युवाहरू एमालेमा प्रवेश गरेका छन् । उनीहरूलाई पनि उपाध्यक्ष पौडेलले पार्टीमा स्वागत गर्दै युवाको ऊर्जा र योजनाअनुसार पार्टी अघि बढ्ने विश्वास व्यक्त गरे ।
प्रतिक्रिया