काठमाडौं । झापा क्षेत्र नम्बर ५ मा प्रतिनिधिसभा सदस्यको निर्वाचनमा स्वतन्त्र उम्मेदवार बालेन्द्र (बालेन) साहले पूर्वप्रधानमन्त्री केपी शर्मा ओलीलाई भारी मतान्तरले पराजित गरेका छन् ।
निर्वाचनको अन्तिम मत परिणामअनुसार साहले ६८ हजार ३४८ मत प्राप्त गर्दै विजय हासिल गरेका छन् । उनका निकटतम प्रतिस्पर्धी नेकपा एमालेका अध्यक्षसमेत रहेका ओलीले १८ हजार ७३४ मत मात्र प्राप्त गरेका छन् । यसरी साहले ओलीलाई ४९ हजार ६१४ मतान्तरले पराजित गरेका हुन् ।
साहले प्राप्त गरेको मत संसदीय निर्वाचनको इतिहासमै अत्यन्त ठूलो मतसंख्याका रूपमा चर्चा गरिएको छ, त्यो पनि ओलीकै गृहजिल्ला झापामा ।
काठमाडौं महानगरपालिकाको प्रमुख हुँदा तत्कालीन प्रधानमन्त्री ओलीसँग विभिन्न विषयमा मतभेद र टकराव देखिएका बालेन साह यसपटक झापा-५ बाट चुनावी मैदानमा उत्रिएका थिए। अन्ततः त्यही प्रतिस्पर्धा चुनावी परिणाममार्फत टुंगिएको छ ।
७३ वर्षीय ओलीका लागि यो संसदीय निर्वाचनमा भोग्नुपरेको दोस्रो पराजय हो। उनले यसअघि झापाबाट छ पटक निर्वाचन जितेका थिए । २०६४ सालको संविधानसभा निर्वाचनमा भने माओवादी लहरका बेला उनी झापा-७ बाट पराजित भएका थिए ।
२०७९ सालको निर्वाचनमा झापा-५ बाट ओलीले सर्वाधिक मतसहित विजय हासिल गरेका थिए। तर यसपटक भने त्यो परिणाम उल्टिँदै साहले ठूलो मतान्तरसहित जित सुनिश्चित गरेका हुन् ।
झापा-५ मा कुल १ लाख ६ हजार ३७२ मत खसेको थियो। यसैबीच राष्ट्रिय स्वतन्त्र पार्टीले झापाका सबै पाँचवटै क्षेत्र तथा मोरङका सबै छवटै क्षेत्रमा विजय हासिल गरेको छ । देशभर पार्टीले हालसम्म ६० सिटमा जित निकाल्दै थप ६२ सिटमा अग्रता बनाएको बताइएको छ ।
प्रतिक्रिया