सर्लाही । प्रतिनिधिसभा सदस्य निर्वाचनअन्तर्गत सर्लाही निर्वाचन क्षेत्र नम्बर ४ मा राष्ट्रिय स्वतन्त्र पार्टी (रास्वपा) का उम्मेदवार अमरेशकुमार सिंह विजयी भएका छन् ।
बिहीबार सम्पन्न निर्वाचनको अन्तिम मतपरिणामअनुसार सिंहले ३५ हजार ६८८ मत प्राप्त गर्दै विजय हासिल गरेका हुन् । उनका निकटतम प्रतिस्पर्धी नेपाली कांग्रेसका सभापति गगनकुमार थापा ले २२ हजार ८३८ मत प्राप्त गरेका छन् । सिंहले थापालाई १२ हजार ८५० मतान्तरले पराजित गरेका हुन् ।
मतगणनाको प्रारम्भदेखि नै अग्रता कायम राखेका सिंहले अन्ततः फराकिलो मतान्तरसहित जीत सुनिश्चित गरेका हुन् । यसअघि पनि उनी यही क्षेत्रबाट स्वतन्त्र उम्मेदवारका रूपमा निर्वाचित भएका थिए ।
सिंह यसअघि नेपाली कांग्रेसबाट दुई पटक तथा २०७९ सालमा स्वतन्त्र उम्मेदवारका रूपमा निर्वाचित भएका थिए । यसपटक भने नेपाली कांग्रेसले प्रधानमन्त्रीको उम्मेदवारसमेत घोषणा गर्दै सभापति थापालाई सर्लाही-४ बाट चुनावी मैदानमा उतारेको थियो ।
यस निर्वाचन परिणामसँगै सर्लाहीका चारवटै प्रतिनिधिसभा निर्वाचन क्षेत्रमा राष्ट्रिय स्वतन्त्र पार्टीले ‘क्लिन स्वीप’ गरेको छ ।
निर्वाचन अधिकृत विनोदप्रसाद घिमिरेका अनुसार नेकपा (एमाले) का उम्मेदवार अमनिशकुमार यादव ले ९ हजार ३४३ मत, नेपाल कम्युनिष्ट पार्टी (नेकपा) का उम्मेदवार रजनिश राय यादव ले १ हजार ४०१ मत तथा जनमत पार्टीका उम्मेदवार राकेश मिश्र ले १ हजार ५७२ मत प्राप्त गरेका छन् ।
कुल १ लाख २१ हजार १२ जना मतदाता रहेको यस क्षेत्रमा ७७ हजार ९३१ मत खसेको थियो ।
प्रतिक्रिया