वाशिङ्टन । अमेरिकी राष्ट्रपति डोनाल्ड ट्रम्पले इरानलाई ४८ घण्टाभित्र होर्मुज जलमार्ग (स्ट्रेट अफ होर्मुज) नखोले कडा सैन्य कारबाही गर्ने चेतावनी दिएका छन् ।
विश्वव्यापी तेल आपूर्तिका लागि अत्यन्तै महत्त्वपूर्ण मानिने उक्त जलमार्ग इरानले अवरुद्ध गरेपछि ट्रम्पले इरानका विद्युत् गृहहरू लक्षित गर्दै प्रहार गर्ने चेतावनी दिएका हुन् । उनले जलमार्ग तुरुन्तै र बिना अवरोध खुला नगरे गम्भीर परिणाम भोग्नुपर्ने उल्लेख गरेका छन् ।
यसैबीच, इरानले डिमोना क्षेत्रमा क्षेप्यास्त्र प्रहार गरेको छ । आक्रमणमा कम्तीमा ४७ जना घाइते भएका छन् भने नजिकैको अराद सहरमा ८८ जनालाई अस्पताल भर्ना गरिएको जनाइएको छ । आक्रमणको लक्ष्य डिमोनास्थित आणविक केन्द्र रहेको बताइएको छ ।
इजरायली प्रधानमन्त्री बेन्जामिन नेतन्याहु ले घटनालाई ‘अत्यन्तै कठिन साँझ’ को संज्ञा दिएका छन् । उता, इरानले भने यो आक्रमण आफ्नो नातान्ज आणविक केन्द्र माथि भएको हमलाको प्रतिकार भएको दाबी गरेको छ ।
अमेरिकी सेन्ट्रल कमान्ड का अनुसार हालै इरानको भूमिगत सैन्य संरचनामाथि गरिएको आक्रमणपछि होर्मुज क्षेत्रमा जहाजलाई धम्की दिने इरानी क्षमतामा केही कमी आएको छ । तर पनि खाडी क्षेत्रमा तनाव कायमै रहेको छ ।
यसै क्रममा जी-७ राष्ट्रका विदेश मन्त्रीहरूले तत्काल आक्रमण रोक्न र क्षेत्रीय स्थिरता कायम गर्न आह्वान गरेका छन् । उनीहरूले विश्वव्यापी ऊर्जा आपूर्ति सुरक्षित राख्न आवश्यक कदम चाल्न तयार रहेको पनि बताएका छन् ।
इरानमा नयाँ वर्षको उत्सव चलिरहेकै बेला इजरायल र अमेरिकाको आक्रमण जारी रहँदा स्थानीय नागरिकमा त्रास बढेको छ । बीबीसीसँग कुरा गर्दै एक इरानी महिलाले यस वर्ष नयाँ वर्षको माहोल नभई निराशा र सन्नाटा छाएको बताएकी छन् ।
प्रतिक्रिया