काठमाडौं । नेकपा एमालेले आफ्ना पार्टी अध्यक्ष तथा पूर्वप्रधानमन्त्री केपी शर्मा ओलीको गिरफ्तारी विरुद्ध कानूनी र राजनीतिक लडाईं लड्ने निर्णय गरेको छ । एमालेले अध्यक्ष ओलीसहित पूर्वगृहमन्त्री रमेश लेखकलाई तत्काल रिहा गर्न माग गरेको छ ।
शनिबार बिहान ९ बजेदेखि पार्टीको केन्द्रीय कार्यालय च्यासलमा बसेको सचिवालय बैठकले ओलीको रिहाइका लागि कानुनी तथा राजनीतिक रूपमा सशक्त प्रतिवाद गर्ने निर्णय गरेको हो।
बैठकपछि सञ्चारकर्मीसँग कुरा गर्दै पार्टी सचिव महेश बस्नेतले आम जनसमुदाय र नागरिक समाजको साथमा कानुनी तथा राजनीतिक संघर्ष अघि बढाउने निर्णय गरिएको जानकारी दिए।
निर्णयअनुसार आज अपराह्न ३ बजे देशभरका जिल्ला सदरमुकाममा जनसंगठनहरूको तर्फबाट विरोध प्रदर्शन हुनेछ।
त्यस्तै, भोलि चैत्र १५ गते दिउँसो १२ बजे जिल्ला पार्टी कमिटीहरूको आयोजनामा प्रत्येक जिल्लामा व्यापक प्रदर्शनसहित प्रमुख जिल्ला अधिकारीको कार्यालयमा विरोधपत्र बुझाउने कार्यक्रम तय गरिएको छ।
एमालेले लोकतन्त्र र कानुनी शासनका पक्षधर सबै राजनीतिक दलहरूसँग संवाद र सहकार्य गर्ने पनि निर्णय गरेको छ । यसैगरी नागरिक समाज र आम जनसमुदायसँग पनि सहकार्य गरेर आन्दोलनलाई अघि बढाउने निर्णय गरेको जनाएको छ।
प्रतिक्रिया