काठमाडौं । सांसद हर्क साम्पाङले दार्चुलामा तुइन विस्थापन गरी झोलुंगे पुल निर्माणका लागि श्रमदान अभियान सुरु गर्ने घोषणा गरेका छन् । सामाजिक सञ्जालमार्फत आह्वान गर्दै उनले धरानबाट ५० जना श्रमदाताको टोली तयार गर्न आग्रह गरेका हुन् ।
पूर्व धरान उपमहानगरपालिका प्रमुख समेत रहेका साम्पाङले बोलेपछि काम गरेरै छाड्ने आफ्नो प्रतिबद्धता दोहोर्याउँदै जीवनलाई प्रतिज्ञा र परीक्षाको रूपमा व्याख्या गरेका छन् ।
उनका अनुसार दार्चुलामा तुइन विस्थापन गरी सुरक्षित आवागमन सुनिश्चित गर्न श्रमदानमार्फत झोलुंगे पुल निर्माण गर्ने योजना अघि सारिएको हो ।
साम्पाङले अभियानमा सहभागी हुने श्रमदाताका लागि बस सेवा निःशुल्क उपलब्ध गराइने जानकारी दिएका छन् । साथै खानाको व्यवस्था सहभागीहरूबीच बाँडेर गर्ने र श्रम तथा कठिनाइ सामूहिक रूपमा वहन गरिने उनले उल्लेख गरेका छन् ।
उनले सहभागीहरूलाई आफ्ना लुगा-कपडा आफैँ बोकेर आउन तथा आवश्यक औजारहरू साथमा ल्याउन समेत आग्रह गरेका छन् ।
प्रतिक्रिया