चैत्र २७ गते संघीय संसदको संयुक्त बैठकलाई राष्ट्रपतिबाट सम्बोधन हुँदै

काठमाडौँ । राष्ट्रपति रामचन्द्र पौडेलले चैत २७ गते शुक्रबार संघीय संसद्का दुवै सदनको संयुक्त बैठकलाई सम्बोधन गर्ने भएका छन् । चैत २७ गते दिउँसो ३ बजे बस्ने संयुक्त बैठकलाई राष्ट्रपति पौडेलले सम्बोधन गर्ने छन् ।

चैत २७ गते दिउँसो ३ बजे संयुक्त सदनलाई सम्बोधन गर्ने र त्यसको व्यवस्था मिलाउन राष्ट्रपति कार्यालयबाट पत्र आएको सङ्घीय संसद् सचिवालयका प्रवक्ता सहसचिव एकराम गिरीले जानकारी दिए ।

राष्ट्रपति पौडेलले सरकारको सिफारिसमा संयुक्त बैठकलाई सम्बोधन गर्न लागेका राष्ट्रपति कार्यालयले संसद सचिवालयमा पठाएको पत्रमा उल्लेख छ ।

संविधानको धारा ९५ अनुसार राष्ट्रपतिले संघीय संसदको संयुक्त बैठकलाई सम्बोधन गर्न लागेका हुन् । सो धारामा ‘राष्ट्रपतिबाट सम्बोधन’ शीर्षकमा ‘राष्ट्रपतिले सङ्घीय संसद्को कुनै सदनको बैठक वा दुवै सदनको संयुक्त बैठकलाई सम्बोधन गर्न र त्यसका लागि सदस्यको उपस्थिति आह्वान गर्न सक्ने व्यवस्था रहेको छ ।