काठमाडौं । प्रतिनिधिसभाको उपसभामुख चयनका लागि आज (चैत २६) उम्मेदवारी दर्ताको समय तोकिएको छ । संसद् सचिवालयले सार्वजनिक गरेको निर्वाचन कार्यतालिकाअनुसार उम्मेदवारी दर्ता बिहान ११ बजेदेखि दिउँसो २ बजेसम्म हुनेछ ।
प्रतिनिधिसभाका सचिव हर्कराज राईद्वारा जारी सूचनामा आजै दिउँसो २:३० बजे उम्मेदवारहरूको नामावली दर्ता क्रमअनुसार प्रकाशन गरिने उल्लेख छ । उपसभामुखको निर्वाचन चैत २७ गते हुने तय भएको छ । सो दिन अपराह्न ४ बजे बस्ने प्रतिनिधिसभा बैठकमा प्रस्तावकले उपसभामुख निर्वाचित गरियोस् भन्ने प्रस्ताव पेस गर्नेछन् । प्रस्तावमाथि छलफलपछि निर्णय गरिनेछ ।
सभामुख डोलप्रसाद अर्यालले बुधबार बसेको प्रतिनिधिसभा बैठकबाट उपसभामुख निर्वाचनको मिति तोक्दै कार्यतालिका सार्वजनिक गर्न निर्देशन दिएका थिए ।
उपसभामुख पदका लागि विपक्षी दलहरूले उम्मेदवारी दिने तयारी गरेका छन् । प्रतिनिधिसभामा दुईतिहाइ बहुमत नजिक रहेको सत्तारूढ राष्ट्रिय स्वतन्त्र पार्टी (रास्वपा) को समर्थन पाउने दलबाट उपसभामुख चयन हुने सम्भावना रहेको छ । यद्यपि, रास्वपाले हालसम्म कसलाई समर्थन गर्ने भन्ने विषयमा निर्णय गरेको छैन ।
प्रतिक्रिया