बुटवल । राष्ट्रिय अपाङ्ग महासंघ नेपालको १० औँ महाधिवेशन बुटवल घोषणापत्र जारी गर्दै सम्पन्न भएको छ । चैत २७ र २८ गते सम्पन्न महाधिवेशनले देविदत्त आचार्यको नेतृत्वमा नयाँ कार्यसमिति चयन गरेको हो ।
महाधिवेशनले महासंघलाई गैर-राजनीतिक चरित्रमा लैजान विधान संशोधन गर्ने निर्णय गरेको छ । आगामी साधारणसभाबाट राजनीतिक दलका सक्रिय सदस्य वा दलनिकट व्यक्तिहरूलाई नेतृत्व तहमा आउन नदिने व्यवस्था गरिने जनाइएको छ ।
नवनिर्वाचित कार्यसमितिमा वरिष्ठ उपाध्यक्षमा अमरबहादुर गुरुङ, महिला उपाध्यक्षमा शोमा कार्की, महासचिवमा कुमार रेग्मी, सचिवमा अस्बीन लम्साल र कोषाध्यक्षमा रमेश कुमार बस्नेत निर्वाचित भएका छन् ।
त्यसैगरी विभिन्न सदस्य पदहरूमा मिरा तामाङ, पुष्विन खत्री, सुनिता थापा, अर्जुन रावल, भेगी कुमारी पुन मगर, झम्क प्रसाद गौतम, लक्ष्मी काफ्ले, जगदीश प्रसाद अर्याल, जानुका रोक्का, दीपक अधिकारी र सूर्यकृष्ण चौलागाईं लगायत निर्वाचित भएका छन् ।
महाधिवेशनले ३८ बुँदे ‘बुटवल घोषणापत्र’ जारी गर्दै अपाङ्गता भएका व्यक्तिहरूको अधिकार, मर्यादा र सशक्तिकरणका लागि राज्यलाई जिम्मेवार बनाउने लक्ष्य राखेको अध्यक्ष आचार्यले बताए ।
घोषणापत्रमा नीतिगत सुधार, पहुँचयुक्त पूर्वाधार, सूचना प्रविधि, स्वास्थ्य, पुनःस्थापना, शिक्षा, रोजगारी, सामाजिक सुरक्षा र सुशासनका विषय समेटिएका छन् ।
अध्यक्ष आचार्यका अनुसार नेपालमा कुल जनसंख्याको करिब २.२५ प्रतिशत नागरिक अपाङ्गता भएका व्यक्तिहरू रहेका छन् ।
प्रतिक्रिया