काठमाडौं । नेपाली कांग्रेसका पूर्वसभापति शेरबहादुर देउवा पक्षधर नेताहरूको भेलाले पार्टीभित्रको एकता मजबुत बनाउन वर्तमान नेतृत्वले जिम्मेवारी लिनुपर्ने निष्कर्ष निकालेको छ।
निवर्तमान कार्यवाहक सभापति पूर्णबहादुर खड्काको आह्वानमा १४औँ महाधिवेशनबाट निर्वाचित केन्द्रीय सदस्यहरूको आइतबार काठमाडौंमा बसेको बैठकले यस्तो धारणा सार्वजनिक गरेको हो।
सर्वोच्च अदालतले पार्टीको आधिकारिकताबारे निर्णय गरिसकेको अवस्थामा अब आन्तरिक विवाद अन्त्य गर्दै एकतावद्ध रूपमा अघि बढ्नुपर्नेमा नेताहरूले जोड दिएका छन्।
सर्वोच्चको फैसलापछि आगामी रणनीति तय गर्न विशेष महाधिवेशनमा सहभागी नभएका सदस्यहरूबीच छलफल केन्द्रित भएको थियो। उक्त छलफलमा पार्टीभित्रको एकता सुदृढ पार्न सानेपास्थित वर्तमान नेतृत्वले समन्वयकारी र नेतृत्वदायी भूमिका निर्वाह गर्नुपर्नेमा सहमति बनेको छ।
कांग्रेस नेता कुन्दनराज काफ्लेका अनुसार, बैठकले निरन्तर संवादमार्फत पार्टीलाई सुदृढ बनाउने र आगामी दिनमा आवश्यक निर्णयहरू लिँदै अघि बढ्ने प्रतिबद्धता व्यक्त गरेको छ। साथै, बैठकमा विगतका गतिविधिको समीक्षा, निर्वाचनमा भएको पराजयका कारण तथा संगठन सुदृढीकरणका विषयमा समेत व्यापक छलफल भएको उनले जानकारी दिए।
प्रतिक्रिया