काठमाडौं । नेकपा एमालेका महासचिव शंकर पोखरेलले पार्टीको मार्गदर्शक सिद्धान्त ‘जनताको बहुदलीय जनवाद (जबज)’ सामु लोकप्रियतावाद, अराजकतावाद र अवसरवाद जस्ता चुनौती अस्थायी रहेको बताएका छन् ।
नेपाल कम्युनिस्ट पार्टीको स्थापना दिवसको अवसरमा संस्थापक नेताहरूको स्मरण गर्दै उनले सामाजिक सञ्जालमार्फत यस्तो धारणा सार्वजनिक गरेका हुन् ।
“जबजका समृद्ध विचारका अगाडि अल्गोरिदमले सिर्जना गरेको लोकप्रियतावाद, अराजकतावाद र अवसरवाद केही समयका पाहुना मात्र हुन्,” उनले उल्लेख गरेका छन् । उनले कम्युनिस्ट आन्दोलनको गौरवपूर्ण इतिहासप्रति सम्मान व्यक्त गर्दै जबजको मार्गदर्शनमा समाजवादतर्फ दृढतापूर्वक अघि बढ्न आह्वान गरेका छन् ।
पोखरेलले नेकपाका संस्थापक पुष्पलाल श्रेष्ठ, नारायणविलास जोशी, निरञ्जन गोविन्द वैद्य, नरबहादुर कर्माचार्य र मोतीदेवी श्रेष्ठलगायतका नेताहरूको योगदानको स्मरण गरेका छन् ।
यसै अवसरमा आज एमाले केन्द्रीय कार्यालयमा आयोजना हुने ७७औँ स्थापना दिवस कार्यक्रममा उपत्यकामा रहेका नेता-कार्यकर्तालाई सहभागी हुन र काठमाडौं बाहिर सम्बन्धित कमिटीहरूले आयोजना गरेका कार्यक्रममा पनि उपस्थित हुन उनले आग्रह गरेका छन् ।
प्रतिक्रिया