बुटवल । बुटवल उपमहानगरपालिकाले सरकारी स्वामित्वको जग्गामा निर्माण गरिएका घरटहरा तत्काल हटाउन सूचना जारी गरेको छ । सूचना अनुसार सम्बन्धित संरचना नहटाइएमा महानगर आफैंले हटाउने तयारी गरेको छ ।
उक्त जग्गा साबिक लुम्बिनी अन्चलाधिश कार्यालय बुटवलको नाममा दर्ता भई तत्कालीन सरकारको निर्णयअनुसार हाल उच्च अदालत तुलसीपुर बुटवल इजलासलाई भोगाधिकार प्राप्त रहेको जनाइएको छ ।
बुटवल उपमहानगरपालिका साबिक वडा नं. ६ हाल वडा नं. ४ अन्तर्गत पर्ने साविक कित्ता नं. ३९६ (हाल कित्ता नं. ७८१२६११३४) को करिब २ बिघा ५ कठ्ठा १४ धुर क्षेत्रफलमा बनेका घरटहरा हटाउन महानगरले सार्वजनिक सूचना जारी गरेको हो ।
उपमहानगरपालिकाले उक्त क्षेत्र अतिक्रमणमुक्त गराउने उद्देश्यले तत्काल संरचना हटाउन आग्रह गरेको छ । अन्यथा कानुनी प्रक्रिया अनुसार बल प्रयोग गरेर हटाइने चेतावनी समेत दिइएको छ ।
स्रोतका अनुसार सम्भवत: भोलि बिहानैदेखि उक्त क्षेत्रमा डोजर परिचालन हुन सक्ने बताइएको छ । उपमहानगरपालिकाको यस कदमसँगै स्थानीय बासिन्दामा चासो र त्रास दुवै बढेको छ ।
उपमहानगरपालिकाले सार्वजनिक तथा सरकारी जग्गाको संरक्षण र व्यवस्थापनलाई प्राथमिकतामा राख्दै यस्ता अतिक्रमणविरुद्ध अभियानलाई निरन्तरता दिने जनाएको छ ।
प्रतिक्रिया