काठमाडौं । आईसीसी क्रिकेट विश्वकप लिग-२ अन्तर्गत आज नेपाल र यूएईबीच महत्वपूर्ण खेल हुँदैछ । त्रिवि क्रिकेट मैदानमा बिहान ९ः३० बजे सुरु हुने यस खेलमा नेपाल रोहित पौडेल र यूएई मोहम्मद वासिम को कप्तानीमा मैदान उत्रनेछन् ।
दुवै टोली शीर्ष ६ मा रहँदै अन्तर्राष्ट्रिय मान्यता जोगाउनका लागि जित निकाल्न दबाबमा छन् । जारी त्रिकोणात्मक शृंखलामा तीनवटै टोलीले एक-अर्काविरुद्ध दुई-दुई खेल खेल्ने तालिका रहेको छ ।
यसअघि खेलेका खेलमा नेपालले यूएईलाई ३७ रनले पराजित गरेको थियो भने ओमानसँग १०२ रनले हार व्यहोरेको छ । यूएईले भने पहिलो खेलमा नेपालसँग हार बेहोरेपछि दोस्रो खेलमा ओमानलाई २५ रनले पराजित गरेको छ ।
अंकतालिकामा दुवै टोली पुछारतिर रहेका छन् । समान २२ खेल खेलेका नेपाल र यूएईले ६-६ खेलमा जित निकालेका छन् । नेपाल १४ अंकसहित पुछारबाट दोस्रो स्थानमा छ भने १२ अंकसहित यूएई अन्तिम स्थानमा रहेको छ ।
घरेलु मैदानको फाइदा उठाउँदै नेपाल आजको खेलमा जित निकाल्दै अंकतालिकामा आफ्नो स्थिति सुधार गर्ने लक्ष्यका साथ मैदानमा उत्रनेछ । शुक्रबारको खेलपछि वैशाख २० गते ओमान र यूएई तथा वैशाख २२ गते नेपाल र ओमानबीच अन्तिम प्रतिस्पर्धा हुनेछ ।
प्रतिक्रिया