काठमाडौं । आईसीसी क्रिकेट विश्वकप लिग-२ अन्तर्गत स्कटल्यान्डलाई ६ विकेटले पराजित गर्दै नेपाल अंक तालिकाको पाँचौँ स्थानमा उक्लिएको छ । कीर्तिपुरस्थित त्रिवि क्रिकेट मैदानमा स्कटल्यान्डले दिएको १९५ रनको लक्ष्य नेपालले ३८ ओभर १ बलमा ४ विकेट गुमाएर पूरा गरेको हो ।
यो जितसँगै नेपालले नामिबियालाई रन रेटले पछाडि पारेको छ। नामिवियाको समान २२ अंक छ । हालसम्म नेपालले २७ खेलमा १० जित र १५ हार व्यहोरेको छ ।
नेपालको जितमा कप्तान रोहित पौडेलले अविजित ७४ रनको उत्कृष्ट इनिङ्स खेले । उनले ९८ बलमा ५ चौका र २ छक्का प्रहार गरे । रोहितले इशान पाण्डेसँग तेस्रो विकेटका लागि शतकीय साझेदारी गर्दै टोलीलाई सहज जित दिलाए ।
इशान पाण्डेले ६१ बलमा ५ चौका र २ छक्कासहित ५५ रन बनाए । ओपनर कुशल भुर्तेल र आसिफ शेखले पहिलो विकेटका लागि ५८ रनको साझेदारी गरेका थिए । कुशल २८ तथा आसिफ २९ रनमा आउट भए । त्यसपछि रोहित र इशानले नेपालको इनिङ्स सम्हालेका थिए ।
उपकप्तान दीपेन्द्रसिंह ऐरी २ रनमा आउट हुँदा आरिफ शेख ८ रनमा अविजित रहे । स्कटल्यान्डका लागि मार्क वाटले २ विकेट लिए भने ब्रेन्डन म्याकमुलेनले १ विकेट हात पारे ।
यसअघि टस जितेर ब्याटिङ गरेको स्कटल्यान्ड ३९ ओभर १ बलमा १९४ रनमा समेटिएको थियो । स्कटल्यान्डका लागि ब्रेन्डन म्याकमुलेनले सर्वाधिक ७३ रन बनाए । उनले ४४ बलमा ६ चौका र ६ छक्का प्रहार गरे । माइकल इंग्लिसले ७२ बलमा ५१ रनको अर्धशतकीय इनिङ्स खेले ।
यस्तै जर्ज मुन्सेले २१, कप्तान रिची बेरिङटनले १२ तथा मार्क वाटले २० रन जोडे । अन्य ब्याटरले उल्लेखनीय प्रदर्शन गर्न सकेनन् ।
नेपालका लागि स्पिनर ललित राजवंशीले उत्कृष्ट बलिङ गर्दै ४ विकेट लिए । सन्दीप लामिछानेले ३ विकेट हात पार्दा नन्दन यादव, सोमपाल कामी र दीपेन्द्रसिंह ऐरीले समान १–१ विकेट लिए ।
यस जितसँगै नेपाल २७ खेलबाट २२ अंक जोड्दै पाँचौँ स्थानमा पुगेको छ । समान २२ अंक भए पनि नामिबिया रनरेटमा पछि पर्दै छैटौँ स्थानमा रहेको छ । क्यानडा २१ अंकसहित सातौँ तथा यूएई १४ अंकसहित पुछारमा छन् ।
स्कटल्यान्ड ३८ अंकसहित शीर्ष स्थानमा कायम रहँदा अमेरिका ३६ अंकसहित दोस्रो स्थानमा छ । ओमान ३१ अंकसहित तेस्रो र नेदरल्याण्ड्स २८ अंकसहित चौथो स्थानमा रहेका छन् ।
नेपालले अब शृङ्खलाको अन्तिम खेल शुक्रबार अमेरिकाविरुद्ध खेल्नेछ ।
प्रतिक्रिया