भक्तपुर । नेकपा (एमाले) केन्द्रीय सचिवालयको बैठकमा आज पाँच उपाध्यक्षहरूले समीक्षात्मक धारणा प्रस्तुत गरेका छन् । एमाले अध्यक्ष केपी शर्मा ओलीको निवास गुण्डुमा आज ११ः०० बजे बसेको केन्द्रीय सचिवालय बैठकमा छ घण्टाभन्दा बढी पार्टीको समग्र अवस्था र निर्वाचनका बारेमा घनिभूत छलफल गरिएको छ ।
बैठकमा एमालेका चार उपाध्यक्षहरूले पार्टी अध्यक्ष केपी शर्मा ओली पुस्तान्तरण गर्नुपर्ने बताएको बैठकमा सहभागी एक नेताले बताए । ती नेताका अनुसार सचिवालय बैठकमा धारणा राखेका पाँच उपाध्यक्षमध्ये चार जनाले पार्टी जोगाउन ओलीले पुस्तान्तरण गर्नुपपर्ने बताएका हुन्। उनीहरूले पुनर्गठन, रुपान्तरण र पुस्तान्तरण गरेर जानुपर्ने धारणा राखेका थिए।
यस्तो धारणा राख्नेहरुमा उपाध्यक्ष विष्णु पौडेल, रघुजी पन्त, पृथ्वीसुब्बा गुरुङ र गोकर्ण विष्ट रहेका छन् । उपाध्यक्ष रामबहादुर थापाले भने ओलीकै नेतृत्वमा पार्टी सुदृढ बनाउनुपर्ने धारणा राखेका थिए ।
साँझ बैठकपछि सञ्चारकर्मीलाई बैठकबारे जानकारी दिँदै पार्टीका उपमहासचिव लेखराज भट्टले पार्टीको अहिलेको अवस्थासम्मको समग्र समीक्षा र निर्वाचनका बारेमा लामो छलफल भएको बताए ।
आजको बैठकमा पाँच जनाले लामो समय लिएर बोलेको र अझै १२ जनाले बोल्न बाँकी रहेको बताउँदै उनले नेताहरूको कार्यविभाजनको विषय आजको बैठकमा प्रवेश नपाएको जानकारी दिए ।
सचिवालयको अर्को बैठक भोलि बिहान ११ः३० बजे गुण्डुस्थित अध्यक्ष निवासमा पुनः बस्ने गरी स्थगन भएको उनले जानकारी दिए ।
प्रतिक्रिया