बुटवल । रुपन्देही प्रहरीले नक्कली नोट छाप्ने अड्डामा छापा मारेर नक्कली नोट छाप्ने कम्प्युटर र प्रिन्टरसहित २ जनालाई पक्राउ गरेको छ । जिल्लाको लुम्बिनी सास्कृतिक नगरपालिकाबाट नोट छाप्न प्रयोग गरिने कम्प्युटर, प्रिन्टर, कैची तथा केही नक्कली नोटसहित २ जनालाई प्रहरीले पक्राउ गरेको हो ।
पक्राउ पर्नेहरुमा भारत ककरहवा सिद्धार्थनगर नौगढ उत्तर प्रदेश बस्ने अव्दुल गफ्फरको छोरा ३८ वर्षिय अव्दुल हमिद र रुपन्देही लुम्बिनी सास्कृतिक नगरपालिका वडा नं.११ मसिना बस्ने २२ वर्षिय बिक्की भन्ने अनिल पासी रहेका छन् ।
लुम्बिनी साँस्कृतिक नगरपालिका इलाकामा नक्कली नोटको कारोवार हुने गरेको छ भन्ने गोप्य सूचनाका आधारमा प्रारम्भिक अनुसन्धानको क्रममा उक्त कार्यमा संलग्न रहेका व्यक्तिहरुको पहिचान एंव खोजतलास गर्ने क्रममा इलाका प्रहरी कार्यालय लुम्बिनीबाट खटिएको प्रहरी टोलिले नोट छाप्ने स्थान र छाप्ने सामाग्री सहित उनीहरुलाई पक्राउ गरेको हो ।
पक्राउ परेकाहरुबाट सबै नाटहरुमा एउटै नम्बर ङ २५ ०२४९१२ रहेको नक्कली नेपाली रु ५०० दरको नोट ३० थान, नेपाली रु १००, ५०० र १००० दरको प्रिन्ट भई कटिङ्ग नगरेको अवस्थामा रहेका नक्कली नोट ७ थान, नक्कली नोट प्रिन्ट गर्न प्रयोग गरेको सिपीयु १ थान, नक्कली नोट प्रिन्ट गर्न प्रयोग गरेको प्रिन्टर १ थान, नक्कली नोट प्रिन्ट गर्न प्रयोग गरेको मोनिटर १ थान, मोबाइल २ थान, कैची १ थानलगायत कागजहरु बरामद भएको प्हरीले जनाएको छ ।
प्रतिक्रिया