काठमाडौं । नेकपा एमाले को केन्द्रीय सचिवालय बैठक भक्तपुरको गुण्डुस्थित अध्यक्ष केपी शर्मा ओली को निवासमा जारी छ । शुक्रबारदेखि सुरु भएको बैठक आज तेस्रो दिनमा प्रवेश गरेको हो ।
बैठकमा अधिकांश पदाधिकारीहरूले अध्यक्ष ओलीको कार्यशैलीको आलोचना गर्दै नेतृत्व परिवर्तन र पार्टी पुनर्गठनका लागि मार्गप्रशस्त गर्न दबाब दिएका छन् । स्रोतका अनुसार, शुक्रबार र शनिबार धारणा राख्ने अधिकांश नेताहरू ओलीको विपक्षमा उभिएका थिए ।
शनिबार महासचिव शंकर पोखरेलले समेत घुमाउरो शैलीमा पार्टी अहिलेको अवस्थाबाट अघि बढ्न नसक्ने धारणा राखेका थिए । उपमहासचिवहरू योगेश भट्टराई र रघुबिर महासेठ, सचिवहरू छविलाल विश्वकर्मा, हिक्मत कार्की र यामलाल कँडेल ले पनि ओलीको नेतृत्वप्रति असन्तुष्टि जनाएका थिए । यसअघि उपाध्यक्ष विष्णु पौडेल सहित चार उपाध्यक्षले समेत नेतृत्व परिवर्तनको संकेत गरेका थिए ।
उपाध्यक्ष रामबहादुर थापा, सचिव महेश बस्नेत, उपमहासचिव लेखराज भट्ट र सचिव पद्मा अर्याल भने ओलीको पक्षमा उभिएका छन् । उनीहरूले संकटको समयमा नेतृत्वको संरक्षण गर्नुपर्ने बताएका छन् ।
आजको बैठकमा बोल्न बाँकी रहेका सचिवहरू शेरधन राई, भानुभक्त ढकाल, राजन भट्टराई र खगराज अधिकारी ले धारणा राख्ने कार्यक्रम छ । त्यसपछि अध्यक्ष ओलीले सचिवालय बैठकमा उठेका प्रश्नहरूको जवाफ दिने कार्यसूची रहेको छ ।
बहुमत पदाधिकारीहरूले अध्यक्ष ओलीलाई मार्गप्रशस्त गर्न आग्रह गरे पनि ओली त्यसका लागि तयार छैनन् । आफू महाधिवेशनबाट निर्वाचित नेतृत्व भएकाले कसैले भन्दैमा पद नछाड्ने अडान उनले लिएका छन् । ओलीले सचिवालय बैठकमा उठेका विषयहरू केन्द्रीय कमिटीमा लगेर थप छलफल गर्नुपर्ने पक्षमा रहेको बताइएको छ ।
प्रतिक्रिया