काठमाडौं । राष्ट्रवादी, राजावादी र देशभक्त शक्तिलाई एकीकृत गर्ने उद्देश्यसहित दुर्गा प्रसाईं नेतृत्वको नागरिक बचाउ अभियान र राष्ट्रिय प्रजातन्त्र पार्टी (राप्रपा) का निवर्तमान महामन्त्री धवलशमशेर राणा नेतृत्वको समूहबीच एकता भएको छ । शुक्रबार दुवै पक्षबीच एकता सम्झौतामा हस्ताक्षर भएको हो ।
एकतापछि पुराना राजनीतिक शक्तिको विकल्पका रूपमा राष्ट्रवादको मुद्दामा केन्द्रित नयाँ राजनीतिक शक्ति निर्माण गर्ने घोषणा गरिएको छ ।
दुवै समूहले सनातन हिन्दु अधिराज्य पुनर्स्थापना, पृथ्वीनारायण शाहको दिव्योपदेशमा आधारित राजनीतिक दर्शन तथा ‘एकपटकको नेपाली सधैँको नेपाली’ हुने गरी दोहोरो नागरिकताको व्यवस्था गर्ने एजेन्डासहित नयाँ दल गठन गर्ने बताएका छन् ।
एकता घोषणाका क्रममा उनीहरूले वर्तमान राजनीतिक शक्तिहरूसँगै नयाँ उदाएका दलहरूको पनि विकल्प खोज्ने बताएका छन् । विशेषगरी राष्ट्रवाद, राजसंस्था र हिन्दु राष्ट्रको मुद्दालाई केन्द्रमा राखेर राजनीतिक अभियान अघि बढाइने जनाइएको छ ।
यद्यपि दुई समूहबीच एकताको सहमति भए पनि नयाँ पार्टीको नाम भने हालसम्म सार्वजनिक गरिएको छैन । पार्टीको नाम, संगठनात्मक संरचना र आगामी कार्यक्रमबारे थप निर्णय क्रमशः सार्वजनिक गरिने बताइएको छ ।
प्रतिक्रिया