काठमाडौं । एसियन गेम्स पुरुष क्रिकेट छनोट प्रतियोगिताको सेमिफाइनलमा नेपालले ओमानलाई ९४ रनमा समेट्दै फाइनल यात्रातर्फ बलियो आधार बनाएको छ ।
सिंगापुरस्थित नेसनल क्रिकेट मैदानमा टस जितेर पहिले ब्याटिङ गरेको ओमान १९.४ ओभरमा ९४ रन बनाउँदै अलआउट भयो । अब नेपालले फाइनल प्रवेशका लागि ९५ रनको सामान्य लक्ष्य पछ्याउनेछ ।
नेपालका बलरहरूले सुरुदेखि नै अनुशासित र कसिलो प्रदर्शन गर्दै ओमानका ब्याट्सम्यानलाई दबाबमा राखेका थिए । तीव्र गतिका बलर करण केसीले चार ओभरमा एक मेडनसहित २० रन खर्चेर तीन विकेट लिएर उत्कृष्ट प्रदर्शन गरे ।
सन्दीप लामिछानेले चार ओभरमा १९ रन खर्चेर दुई विकेट लिए भने सोमपाल कामीले एक मेडनसहित २६ रन दिएर दुई विकेट हात पारे । साहब आलम, कुशल मल्ल र कप्तान दीपेन्द्रसिंह ऐरीले समान एक–एक विकेट लिए ।
ओमानका लागि कप्तान सुफयान महमूदले सर्वाधिक ३८ रन बनाए । जुबैर अल बालुशीले २२ तथा अब्दुल जलीलले १६ रन जोडे । अन्य कुनै पनि ब्याट्सम्यानले दोहोरो अंकमा रन बनाउन सकेनन् ।
समूह ‘ए’ को विजेता बनेर सेमिफाइनल पुगेको नेपाल लगातार तेस्रो जितको खोजीमा छ । नेपालले यसअघि समूह चरणमा चीनलाई २२१ रन र मलेसियालाई १६७ रनको विशाल अन्तरले पराजित गरेको थियो ।
प्रतियोगिताको सेमिफाइनलमा पुगेसँगै नेपालले एसियन गेम्समा स्थान सुरक्षित गरिसकेको छ । अब नेपाल ओमानविरुद्धको लक्ष्य पूरा गर्दै फाइनल प्रवेश गर्ने लक्ष्यसहित मैदानमा उत्रिनेछ ।
प्रतिक्रिया