काठमाडौं । एसियन गेम्स पुरुष क्रिकेट छनोट प्रतियोगिताअन्तर्गत समूह चरणको अन्तिम खेलमा नेपालले आज मलेसियासँग प्रतिस्पर्धा गर्दैछ । लगातार दोस्रो जित निकाल्दै समूह ‘ए’ को विजेता बन्ने लक्ष्यसहित नेपाली टोली मैदान उत्रिन लागेको हो ।
सिंगापुर नेसनल क्रिकेट ग्राउन्डमा हुने खेल नेपाली समयअनुसार दिउँसो १२ः१५ बजे सुरु हुनेछ । यस खेलको नतिजाले समूह ‘ए’ को विजेता र उपविजेताको टुंगो लगाउनेछ । विजयी टोली समूह विजेता तथा पराजित टोली उपविजेता बन्नेछ ।
प्रतियोगिताको पहिलो खेलमा नेपाल र मलेसिया दुवैले चीनलाई पराजित गर्दै सुखद सुरुआत गरेका थिए । नेपालले चीनलाई २२१ रनको विशाल अन्तरले हराएको थियो भने मलेसियाले चीनमाथि ९ विकेटको सहज जित निकालेको थियो ।
दुवै टोलीले आगामी एसियन गेम्समा स्थान सुरक्षित गरिसकेकाले आजको खेल प्रतिष्ठा र समूह शीर्षताको लागि महत्वपूर्ण मानिएको छ ।
नेपाल र मलेसियाबीच हालसम्म १० वटा ट्वान्टी-२० अन्तर्राष्ट्रिय खेल भएका छन् । तीमध्ये नेपालले ९ खेलमा जित हासिल गरेको छ भने मलेसियाले एक खेलमा मात्र सफलता पाएको छ ।
पछिल्लो प्रदर्शन र आपसी भेटको इतिहासका आधारमा नेपाल बलियो देखिए पनि घरेलु समर्थकको साथ पाएको मलेसियाविरुद्ध नेपाली टोलीले सावधानीपूर्वक खेल्नुपर्ने चुनौती रहनेछ ।
प्रतिक्रिया