काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले आह्वान गरेको सर्वदलीय बैठकमा नेपाली कांग्रेस र नेकपा एमालेका शीर्ष नेताहरू सहभागी नहुने भएका छन् ।
रास्वपाले प्रतिनिधिसभा र राष्ट्रियसभामा प्रतिनिधित्व गर्ने सबै राजनीतिक दलका अध्यक्ष वा सभापतिसहित दुई जना प्रतिनिधिलाई बैठकमा सहभागी हुन निमन्त्रणा गरेको थियो। तर, कांग्रेस र एमालेका शीर्ष नेतृत्व बैठकमा नआउने भएका हुन् ।
नेपाली कांग्रेसका तर्फबाट संसदीय दलका नेता भीष्मराज आङ्देम्बे बैठकमा सहभागी हुने कांग्रेस प्रमुख सचेतक बासना थापाले जानकारी दिइन् ।
त्यसैगरी, नेकपा एमालेका तर्फबाट प्रमुख सचेतक ऐन महर सहभागी हुने जनाइएको छ ।
सर्वदलीय बैठक आज बिहान ९ बजे सिंहदरबारस्थित सार्वजनिक लेखा समितिको हलमा बस्ने कार्यक्रम छ ।
रास्वपाका महामन्त्री कविन्द्र बुर्लाकोटीका अनुसार बैठकमा समसामयिक राजनीतिक विषय, संसद्को अवस्था तथा पछिल्ला राजनीतिक घटनाक्रमबारे छलफल गरिनेछ ।
प्रतिक्रिया