काठमाडौं । अमेरिका र इरानबीच युद्ध अन्त्यका लागि शान्ति सम्झौता भएको खबर सार्वजनिक भएसँगै अन्तर्राष्ट्रिय बजारमा कच्चा तेलको मूल्य उल्लेख्य रूपमा घटेको छ । दुई देशबीच मध्यस्थताको भूमिका निभाइरहेको पाकिस्तानले सम्झौताको घोषणा गरेलगत्तै एसियाली बजारको प्रारम्भिक कारोबारमा तेलको मूल्य ओरालो लागेको हो ।
अन्तर्राष्ट्रिय बजारमा तेलको मूल्य मापन गर्ने प्रमुख सूचक ब्रेन्ट क्रुडको मूल्य ३.८ प्रतिशतले घटेर प्रतिब्यारेल ८४.०२ अमेरिकी डलरमा झरेको छ । त्यस्तै अमेरिकी बजारमा कारोबार हुने डब्लुटीआई कच्चा तेलको मूल्य ४.१ प्रतिशतले घट्दै प्रतिब्यारेल ८१.४० डलरमा पुगेको छ ।
पाकिस्तानी प्रधानमन्त्री शहबाज सरिफका अनुसार आगामी जुन १९ मा स्विट्जरल्यान्डमा अमेरिका र इरानबीचको शान्ति सम्झौतामा औपचारिक हस्ताक्षर हुनेछ । अमेरिकी राष्ट्रपति डोनाल्ड ट्रम्पले पनि सम्झौताको पुष्टि गर्दै सामाजिक सञ्जालमार्फत अब ‘तेलको प्रवाह सुचारु हुने’ बताएका छन् । उनका अनुसार सम्झौतापछि विश्वकै रणनीतिक महत्व बोकेको हर्मुज जलडमरूमध्य पुनः सञ्चालनमा आउनेछ ।
गत फेब्रुअरी २८ मा अमेरिका र इजरायलले इरानमाथि हवाई आक्रमण गरेपछि हर्मुज जलडमरूमध्य पूर्ण रूपमा बन्द भएको थियो । विश्वको कुल कच्चा तेल तथा तरल प्राकृतिक ग्यास (एलएनजी) आपूर्तिको करिब २० प्रतिशत यही मार्गबाट हुने भएकाले यसको बन्दले विश्व ऊर्जा बजारमा ठूलो प्रभाव परेको थियो ।
इरानले सो क्षेत्रबाट आवतजावत गर्ने मालवाहक जहाजमाथि आक्रमण गर्ने चेतावनी दिएपछि विश्वव्यापी इन्धन आपूर्तिमा अवरोध सिर्जना भएको थियो । अमेरिका-इरान द्वन्द्वका कारण पछिल्ला केही महिनादेखि ऊर्जा बजारमा तीव्र उतारचढाव देखिएको थियो ।
युद्ध सुरु हुनुअघि प्रतिब्यारेल ७० डलर हाराहारीमा रहेको ब्रेन्ट क्रुडको मूल्य द्वन्द्व चर्किएको समयमा १२० डलरसम्म पुगेको थियो । पछिल्लो शान्ति सम्झौताको खबरले भने अन्तर्राष्ट्रिय ऊर्जा बजारमा केही राहतको संकेत दिएको विश्लेषण गरिएको छ ।
प्रतिक्रिया