काठमाडौं । पूर्वमन्त्री तथा नेकपा (एमाले)का उपाध्यक्ष विष्णु पौडेललाई सम्पत्ति शुद्धीकरण सम्बन्धी अनुसन्धानका लागि पुनः थुना म्याद थप गर्न विशेष अदालतमा उपस्थित गराइएको छ ।
उनीमाथिको म्याद थप सम्बन्धी सुनुवाइ न्यायाधीशहरू नारायणप्रसाद पौडेल, हेमन्त रावल र उमेश कोइरालाको इजलासमा हुने तयारी भइरहेको छ ।
पौडेललाई गत असार ८ गते सुर्खेतबाट पक्राउ गरिएको थियो । अर्थमन्त्री रहेका बेला व्यवसायी दीपक भट्टलाई सेयर खरिद प्रक्रियामा सहजीकरण गरेको आरोपमा सम्पत्ति शुद्धीकरण अनुसन्धान विभागले उनीमाथि अनुसन्धान अघि बढाएको हो ।
यसअघि विशेष अदालतले पौडेलविरुद्ध जारी गरिएको जरूरी पक्राउ पूर्जीलाई स्वीकृति दिँदै सात दिनको थुना म्याद दिएको थियो । सोही आदेशअनुसार उनलाई असार ९ गते पहिलो पटक अदालतमा उपस्थित गराइएको थियो ।
यता, पक्राउविरुद्ध पौडेलकी पत्नी दोमायाले दायर गरेको बन्दीप्रत्यक्षीकरण रिटमा सर्वोच्च अदालतले सम्पत्ति शुद्धीकरण अनुसन्धान विभाग र नेपाल प्रहरीसँग लिखित जवाफ माग गरेको छ । अनुसन्धान जारी रहेकाले अदालतले थप म्यादबारे निर्णय गर्ने तयारी गरेको छ ।
प्रतिक्रिया