काठमाडौं । नेपाल क्रिकेट सङ्घ (क्यान) ले नेपाल प्रिमियर लिग (एनपीएल) को तेस्रो संस्करण आगामी कात्तिक ९ गतेदेखि मङ्सिर ५ गतेसम्म आयोजना गर्ने घोषणा गरेको छ ।
क्यानका सचिव पारस खड्काले शनिबार साँझ जारी गरेको विज्ञप्तिमार्फत एनपीएलको तेस्रो संस्करणको मिति सार्वजनिक गरेका हुन् । यसअनुसार प्रतियोगिता अक्टोबर २६ देखि नोभेम्बर २१ सम्म सञ्चालन हुनेछ ।
यसअघिका दुई संस्करण तिहारपछि मङ्सिर महिनामा आयोजना हुँदै आएकोमा यसपटक क्यानले दशैँ र तिहारको बीचको समयलाई प्रतियोगिताका लागि छनोट गरेको हो ।
प्रतियोगिताको विस्तृत खेल तालिका भने सार्वजनिक हुन बाँकी छ । क्यान स्रोतका अनुसार तिहारका दुई दिनबाहेक अन्य दिनमा नियमित रूपमा खेल सञ्चालन गर्ने तयारी भइरहेको छ ।
एनपीएलका लागि खेलाडी छनोटको लिलामी प्रक्रिया यसअघि नै सम्पन्न भइसकेको छ । हाल सहभागी टोलीहरू विदेशी खेलाडी अनुबन्ध गर्ने तयारीमा जुटेका छन् ।
नेपालको घरेलु क्रिकेटको सबैभन्दा ठूलो फ्रेन्चाइज प्रतियोगिताका रूपमा स्थापित हुँदै गएको एनपीएलको तेस्रो संस्करणमा पनि विभिन्न आठ टोलीको सहभागिता रहनेछ ।
प्रतिक्रिया