काठमाडौं । नेपाली कांग्रेसका निवर्तमान कार्यवाहक सभापति पूर्णबहादुर खड्का पार्टीका नेताहरू तथा कार्यकर्तासहित कृष्णप्रसाद भट्टराई आश्रम, बाँडेगाउँ पुगेका छन्।
आश्रम पुगेपछि खड्काले पार्टीको सम्पूर्ण एकताको संकल्प गर्न आफू किसुनजीको आश्रममा आएको प्रतिक्रिया दिएका छन्। उनले भने, ‘पार्टीको सम्पूर्ण एकताको संकल्प गर्न आएको किसुनजीको आश्रममा।’
गत भदौ २४ गते जेन–जी आन्दोलनका क्रममा आगजनी भएको आश्रमको अवस्थाबारे अवलोकन गर्न खड्का यसअघि भदौ २८ गते पनि बाँडेगाउँ पुगेका थिए। त्यसपछि उनी दोस्रोपटक आश्रम पुगेका हुन्।
खड्काको बाँडेगाउँ भ्रमण र उनको प्रतिक्रिया सचिवालयले सञ्चारमाध्यमलाई उपलब्ध गराएको हो।
खड्कासँगै कांग्रेस नेताहरू रामहरि खतिवडा, ईश्वरी न्यौपाने, ऐनबहादुर शाही, कान्तिका सेजुवाल, अम्बिका बस्नेत, कृष्णप्रसाद पौडेल तथा कर्णाली प्रदेश सभापति ललितजंग शाही लगायत नेताहरू पनि आश्रम पुगेका थिए।
कांग्रेसका संस्थापक नेता तथा पूर्वसभापति कृष्णप्रसाद भट्टराईको स्मृतिसँग जोडिएको बाँडेगाउँस्थित आश्रम पछिल्लो आन्दोलनका क्रममा क्षतिग्रस्त भएको थियो।
प्रतिक्रिया