काठमाडौं । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले पत्रकार तथा सम्पादक किशोर श्रेष्ठको पक्राउप्रति कडा आपत्ति जनाएका छन् । समाचार लेखेकै आधारमा राज्य संयन्त्रमार्फत पत्रकारलाई नियन्त्रणमा लिनु लोकतन्त्रको उपहास भएको उनले बताएका छन् ।
सामाजिक सञ्जालमार्फत धारणा सार्वजनिक गर्दै पूर्वप्रधानमन्त्रीसमेत रहेका प्रचण्डले स्थापित सञ्चारमाध्यम र पत्रकारमाथि निश्चित विधि तथा कानुनी प्रक्रिया नअपनाई धरपकड गरिएको आरोप लगाएका छन् । प्रेस स्वतन्त्रतामाथि राज्यले अङ्कुश लगाउन खोजेको उल्लेख गर्दै उनले पक्राउ परेका पत्रकार श्रेष्ठलाई तत्काल र बिनासर्त रिहा गर्न माग गरेका छन् ।
पत्रकार श्रेष्ठ बुधबार ललितपुरबाट पक्राउ परेका हुन् । उनीमाथि वैयक्तिक गोपनीयता हननसम्बन्धी कसुर लगाइएको छ ।
काठमाडौं प्रहरी परिसरले अदालतबाट पक्राउ पुर्जी लिएपछि उपत्यका अपराध अनुसन्धान कार्यालय र काठमाडौं प्रहरी परिसरको संयुक्त टोलीले श्रेष्ठलाई पक्राउ गरेको हो ।
श्रेष्ठ जनआस्था साप्ताहिक तथा जनआस्था डटकमका सञ्चालक एवं सम्पादक हुन् । उनी प्रेस काउन्सिल नेपालका पूर्वकार्यवाहक अध्यक्षसमेत हुन् ।
प्रतिक्रिया