तिनाउको हेडबक्स नजिक पहिरो, बुटवल-पाल्पा सडक अवरुद्ध

बुटवल । सिद्धार्थ राजमार्गअन्तर्गत बुटवल-पाल्पा सडकखण्ड अवरुद्ध भएको छ । तिनाउ गाउँपालिका-३ स्थित हेडबक्स नजिकै सडक माथिबाट खसेको सुक्खा पहिरोले सडक अवरुद्ध भएको हो ।

नेपाल राजमार्ग सुरक्षा तथा ट्राफिक व्यवस्थापन कार्यालय, लुम्बिनी प्रदेश बुटवलका अनुसार हेडबक्सदेखि बुटवलतर्फको सडकमा पहिरो खसेपछि बिहान करिब साढे ७ बजेदेखि यातायात अवरुद्ध भएको हो ।

सडक माथिबाट पहिरो झर्ने क्रम नरोकिएकाले तत्काल सडक खुलाउन सम्भव नभएको प्रहरीले जनाएको छ । पहिरो झर्ने क्रम रोकिएपछि सडकमा थुप्रिएको पहिरो हटाएर यातायात सञ्चालनमा ल्याउने तयारी गरिएको छ ।

सडक अवरुद्ध भएपछि बुटवलतर्फ आउने तथा बुटवलबाट विभिन्न जिल्लातर्फ छुटेका सवारीसाधन बाटोमै रोकिएका छन् । प्रहरीले पहिरो प्रभावित क्षेत्रमा सावधानी अपनाउन यात्रु तथा चालकलाई आग्रह गरेको छ ।