काठमाडौं । एसीसी पुरुष प्रिमियर कप २०२६ मा नेपालले विजयी सुरुवात गरेको छ । समूह ‘ए’अन्तर्गत आफ्नो पहिलो खेलमा नेपालले बहराइनलाई ७ विकेटले पराजित गर्दै प्रतियोगितामा सुखद सुरुवात गरेको हो ।
बहराइनले दिएको ८८ रनको सामान्य लक्ष्य नेपालले २१ ओभरमै ३ विकेट गुमाएर पूरा गर्यो ।
नेपालको जितमा ओपनर अर्जुन कुमालले अविजित ३६ रनको योगदान दिए । रोहित पौडेलले १४ बलमा १९ रन बनाए भने आसिफ शेखले पनि १९ रन जोडे ।
यसअघि टस जितेर ब्याटिङ गरेको बहराइन नेपाली बलरसामु निरीह देखिएको थियो । बहराइन ३६।२ ओभरमा ८७ रनमै अलआउट भयो । फियाज अहमदले सर्वाधिक १५ रन बनाउँदा मुहम्मद वासिमले १३ तथा अलि दाउदले १० रन बनाए । अन्य ब्याट्सम्यानले उल्लेख्य योगदान दिन सकेनन् ।
नेपालका कप्तान सन्दीप लामिछानेले उत्कृष्ट बलिङ गर्दै १० ओभरमा चार मेडनसहित १४ रन खर्चिएर ५ विकेट लिए । ललित राजबंशीले ३ तथा करण केसीले २ विकेट हात पारे ।
कप्तान लामिछानेको घातक बलिङ र त्यसपछि ब्याट्सम्यानको सहज प्रदर्शनसँगै नेपालले बहराइनविरुद्ध फराकिलो जित निकाल्दै प्रतियोगितामा महत्वपूर्ण दुई अंक जोडेको छ ।
खेल बङ्गीस्थित वाईएसडी युकेएम क्रिकेट मैदानमा भएको हो ।
प्रतिक्रिया