काठमाडौं । एसीसी प्रिमियर कप एकदिवसीय क्रिकेटको उपाधिका लागि नेपाल र संयुक्त अरब इमिरेट्स (यूएई) बीच प्रतिस्पर्धा भइरहेको छ ।
मलेसियाको क्वालालम्पुरस्थित बायुमास ओभलमा जारी फाइनलमा नेपालले यूएईसामु ३१४ रनको लक्ष्य प्रस्तुत गरेको छ ।
टस जितेर पहिले ब्याटिङ गरेको नेपालले निर्धारित ५० ओभरमा ९ विकेट गुमाउँदै ३१३ रनको बलियो योगफल तयार पारेको हो ।
नेपालको इनिङ्समा ओपनर आसिफ शेखले उत्कृष्ट शतकीय पारी खेले । १०६ बलको सामना गरेका आसिफले ८ चौका र ४ छक्काको मद्दतमा १०२ रन बनाए । यो उनको एकदिवसीय अन्तर्राष्ट्रिय ९ओडीआई० करियरको दोस्रो शतक हो ।
आसिफले पहिलो विकेटका लागि अर्जुन कुमालसँग ९७ रनको महत्वपूर्ण साझेदारी गर्दै नेपालको इनिङ्सलाई बलियो सुरुआत दिलाएका थिए । त्यसपछि उनले इशान पाण्डेसँग दोस्रो विकेटका लागि ३६ तथा कप्तान रोहित पौडेलसँग तेस्रो विकेटका लागि ६८ रनको साझेदारी गरे ।
नेपालका लागि गुल्शन झाले आक्रामक अर्धशतकीय पारी खेले । उनले ३८ बलमा ३ चौका र ४ छक्कासहित ५२ रन बनाए । अर्जुन कुमालले ४३ तथा रोहित पौडेलले ४० रन जोडे ।
यस्तै, दीपेन्द्रसिंह ऐरीले १८ र बसिर अहमदले अविजित १५ रन बनाए । नेपालको मध्यक्रम र तल्लो क्रमका ब्याटरले महत्वपूर्ण योगदान गरेपछि नेपालले ३१३ रनको चुनौतीपूर्ण स्कोर बनाउन सफल भयो ।
यूएईका लागि इबरार अहमदले सर्वाधिक चार विकेट लिए । खुजैमा बिन तनभिरले दुई तथा हैदर अली र अदीब उस्मानीले समान एक–एक विकेट लिए ।
यो फाइनल खेलको नतिजा नेपालका लागि निकै महत्वपूर्ण छ । फाइनल जित्न सके नेपाल सन् २०२७ मा बंगलादेशमा आयोजना हुने एसिया कपका लागि छनोट हुनेछ । त्यसैले उपाधिका साथै एसिया कपमा स्थान सुरक्षित गर्ने लक्ष्यसहित नेपाल यूएईविरुद्ध मैदानमा उत्रिएको हो ।
प्रतिक्रिया