काठमाडौं । एसियाली खेलकुदअन्तर्गत पुरुष क्रिकेट प्रतियोगितामा नेपाली राष्ट्रिय क्रिकेट टोलीले आज अफगानिस्तानसँग प्रतिस्पर्धा गर्दैछ ।
नेपाल र अफगानिस्तानबीचको खेल नेपाली समयअनुसार बिहान १०ः४५ बजे जापानको निसिनस्थित कोरोगी स्पोर्ट्स पार्कमा हुनेछ ।
पुरुष क्रिकेटमा नेपाल समूह ‘ए’ मा अफगानिस्तान र जापानसँग रहेको छ । समूहको पहिलो खेलमा अफगानिस्तानले जापानलाई पराजित गरेको थियो । अफगानिस्तानले प्रतियोगितामा आफ्नो मुख्य राष्ट्रिय टोली भने सहभागी गराएको छैन ।
नेपालले समूह चरणको दोस्रो तथा अन्तिम खेल सेप्टेम्बर २६ मा जापानसँग खेल्नेछ । समूह ‘बी’ मा हङकङ चीन, मलेसिया र ओमान रहेका छन् ।
समूह चरणबाट चार टोली क्वार्टरफाइनलमा पुग्नेछन् । क्वार्टरफाइनलका खेल सेप्टेम्बर २८ र २९ मा हुनेछन् । पाकिस्तान, भारत, श्रीलंका र बंगलादेशले भने क्वार्टरफाइनल चरणबाट प्रतियोगिताको सुरुआत गर्नेछन् । सेमिफाइनल अक्टोबर १ तथा कांस्य पदक र स्वर्ण पदकका लागि फाइनल खेल अक्टोबर ३ मा हुने तालिका छ ।
प्रतियोगिताका लागि दीपेन्द्रसिंह ऐरीको कप्तानीमा १५ सदस्यीय नेपाली टोली छनोट गरिएको छ । टोलीमा कप्तान ऐरीसहित कुशल भुर्तेल, आसिफ शेख, रोहित पौडेल, आरिफ शेख, गुलशन झा, करण केसी, सोमपाल कामी, नन्दन यादव, सन्दीप लामिछाने, ललित राजवंशी, शेर मल्ल, सन्दीप जोरा, कुशल मल्ल र लोकेश बम रहेका छन् ।
यसअघि सन् २०२३ मा चीनमा भएको एसियाली खेलकुदको पुरुष क्रिकेटमा भारतले स्वर्ण पदक जितेको थियो । पाकिस्तानलाई पराजित गर्दै बंगलादेशले कांस्य पदक जितेको थियो । महिला क्रिकेटतर्फ भारतले स्वर्ण, श्रीलंकाले रजत र बंगलादेशले कांस्य पदक जितेका थिए ।
प्रतिक्रिया