काठमाडौं । राष्ट्रिय मानव अधिकार आयोगले पूर्वप्रधानन्यायाधीश चोलेन्द्रशमशेर जबरालाई हिरासतमा राखिएका बेला आयोगको टोलीलाई भेट्न नदिएको विषयमा अपराध अनुसन्धान कार्यालय, टेकुका प्रमुख प्रहरी वरिष्ठ उपरीक्षक (एसएसपी) सन्तोष खड्कालाई बयानका लागि बोलाएको छ ।
आयोगले एसएसपी खड्कालाई मंगलबार आयोगमा उपस्थित भएर घटनाबारे बयान दिन पत्राचार गरेको हो ।
आयोगका सदस्य मनोज दुवाडीसहित तीन सदस्यीय टोली आइतबार जबरालाई भेट्न तथा उनको मानव अधिकारको अवस्थाबारे अनुगमन गर्न टेकुस्थित अपराध अनुसन्धान कार्यालय पुगेको थियो । तर, प्रहरीले आयोगको टोलीलाई कार्यालयभित्र प्रवेश गर्न अनुमति नदिएपछि टोली गेटमै करिब ४५ मिनेट बसेर फर्किएको थियो ।
जबरालाई हिरासतमा राखिएको अवस्थाबारे जानकारी लिन तथा उनको मानव अधिकारको अवस्थाको अनुगमन गर्न आयोगको टोली अपराध अनुसन्धान कार्यालय पुगेको थियो । तर, कार्यालय प्रवेश गर्न नदिइएपछि आयोगले घटनाबारे सम्बन्धित प्रहरी अधिकारीसँग स्पष्टीकरण लिन प्रक्रिया अघि बढाएको हो ।
आयोगले प्रहरी कार्यालयमा आयोगको अनुगमन टोलीलाई प्रवेश गर्न नदिनुको कारण र त्यसक्रममा भएको घटनाबारे एसएसपी खड्कासँग जानकारी लिने जनाएको छ ।
प्रतिक्रिया