काठमाडौं । प्रमुख प्रतिपक्षी दल नेपाली कांग्रेसका सभापति गगनकुमार थापाले पार्टीका मुख्य पदाधिकारीको विशेष बैठक आह्वान गरेका छन् । बैठक आज दिउँसो १ बजे पार्टी केन्द्रीय कार्यालय सानेपामा बस्ने भएको छ ।
बैठकमा सरकारका पछिल्ला गतिविधि, पत्रकार तथा सञ्चारगृहमाथि भइरहेको धरपकडलगायत समसामयिक विषयमा छलफल हुने बताइएको छ । कांग्रेसले पछिल्ला घटनाक्रमबारे सरकारको ध्यानाकर्षण गराउने तयारीसमेत गरेको छ ।
बैठकमा वरिष्ठ उपसभापति विश्वप्रकाश शर्मा, उपसभापतिहरू पुष्पा भुसाल, चन्द्र भण्डारी र मधु आचार्य तथा महामन्त्रीहरू प्रदीप पौडेल, डिला संग्रौला र उदयशमशेर राणालगायतलाई बोलाइएको छ ।
बैठकपछि सभापति थापाले मुलुकको समसामयिक राजनीतिक परिस्थिति र पछिल्ला घटनाक्रमबारे विशेष सम्बोधन गर्ने कार्यक्रम रहेको छ ।
कांग्रेसका कार्यवाहक मुख्य सचिव कृष्णप्रसाद दुलालले सूचना जारी गर्दै सम्बोधन कार्यक्रमबारे जानकारी दिएका हुन् । उनले कार्यक्रममा उपस्थितिका लागि पार्टीका नेता, कार्यकर्ता तथा सञ्चारकर्मीलाई अनुरोध गरेका छन् ।
प्रतिक्रिया