काठमाडौं । कर्णाली याक्सलाई चार विकेटले पराजित गर्दै लुम्बिनी लायन्स नेपाल प्रिमियर लिग (एनपीएल) क्रिकेटको तेस्रो संस्करणमा प्लेअफमा प्रवेश गरेको छ । लुम्बिनी जारी प्रतियोगितामा प्लेअफमा पुग्ने पहिलो टोली बनेको छ ।
बिहीबार कीर्तिपुरस्थित त्रिभुवन विश्वविद्यालय क्रिकेट मैदानमा कर्णालीले दिएको १०६ रनको लक्ष्य लुम्बिनीले १६.४ ओभरमा छ विकेट गुमाएर पूरा गर्यो ।
लुम्बिनीको जितमा डार्सी सर्टले सर्वाधिक ४६ रन बनाए । उनले ३४ बलमा छ चौका र एक छक्का प्रहार गरे । चौथो विकेटका लागि सर्टले निरोशन डिक्वेलासँग ४१ रनको साझेदारी गरेका थिए ।
अविजित रहेका दिलिप नाथले २८ रन बनाए । निरोशनले १६ रनको योगदान दिए । यी तीनबाहेक लुम्बिनीका अन्य ब्याटरले दोहोरो अंकमा रन जोड्न सकेनन् ।
कर्णालीका मार्क वाटले उत्कृष्ट बलिङ गर्दै चार विकेट लिए । उनले चार ओभरमा एक मेडनसहित १२ रन खर्चिए । पवन सर्राफ र हुसेन तलतले एक–एक विकेट लिए ।
त्यसअघि टस जितेर पहिले ब्याटिङ गरेको कर्णालीले १९.२ ओभरमा सबै विकेट गुमाएर १०५ रन बनाएको थियो ।
कर्णालीलाई कम योगफलमा समेट्ने क्रममा लुम्बिनीका अभिषेक गौतम, किशोर महतो, डार्सी सर्ट र कप्तान रोहितकुमार पौडेलले समान दुई विकेट लिए । रुबेन ट्रम्पेलमन र शेर मल्लले एक-एक विकेट हात पारे ।
कर्णालीका लागि सोमपाल कामीले सर्वाधिक २८ रन बनाए । हुसेन तलतले २४, गुल्सन झाले १३ र पवन सर्राफले १२ रन जोडे । अन्य ब्याटरले दोहोरो अंकमा रन बनाउन सकेनन् ।
यस जितसँगै लुम्बिनीले एक खेल अगावै प्लेअफमा स्थान पक्का गरेको छ । छ खेलबाट चार जित, एक हार र वर्षाका कारण एक खेल रद्द हुँदा लुम्बिनीले नौ अंक जोडेको छ । टोली अंकतालिकाको शीर्ष स्थानमा उक्लिएको छ ।
पराजयसँगै कर्णालीको प्लेअफ यात्रा कठिन बनेको छ । छ खेलबाट दुई जित र चार हार बेहोरेको कर्णाली चार अंकमा सीमित छ । अब कर्णालीको प्लेअफ सम्भावना चितवन राइनोजविरुद्धको अन्तिम खेलको नतिजामा निर्भर रहनेछ । उक्त खेल आइतबार (कात्तिक २९) हुनेछ ।
प्रतिक्रिया