काठमाडौं । नक्कली भुटानी शरणार्थी प्रकरणमा हिरानसतमा रहेका नेताहरुले आफुलाई थाुना मुक्त गर्न उच्च अदालत गुहारेका छन् । उनीहरुले आफूहरुलाई थुनामा राख्ने आदेश गलत भएको भन्दै साधारण तारेखका छाड्न माग गर्दै उच्च अदालत पाटन पुगेका हुन् ।
जिल्ला अदालतको आदेश बदर गरी आफूहरुलाई सामान्य तारिखमा रिहा गर्नुपर्ने उनीहरुको माग छ । उच्च अदालत जाने नेताहरुमा कांग्रेस नेता एवं पूर्वगृहमन्त्री बालकृष्ण खाँण, एमाले सचिव एवं पूर्वमन्त्री टोपबहादुर रायमाझी, भुटानी शरणार्थी नेता टेकनाथ रिजाललगायत रहेका छन् ।
मुद्दाको विषयवस्तु, प्रमाणको विवेचना नगरी आफूहरुलाई थुनामा राखेको भन्दै उनीहरुले थुनामुक्त गर्ने आदेश माग गरेका छन् । उच्च अदालत पाटनले खाँण र रायमाझीको हकमा कैफियत प्रतिवेदन मगाउने आदेश गरेको छ । उच्च अदालतले उनीहरूलाई थुनामै राखी मुद्दाको पुर्पक्ष गर्नुपर्नाको कारण के हो भनी काठमाडौँ जिल्ला अदालतबाट कैफियत प्रतिवेदन माग गरेको हो ।
यसअघि नै निवेदन दिएकाहरुको हकमा उच्च अदालत पाटनको आदेश अनुसार जिल्ला अदालतबाट प्रतिवेदन पेस भइसकेको छ ।
प्रतिक्रिया