काठमाडौं । भारतको दिल्लीमा मदिरानीतिको अध्ययन गरिरहेको प्रवर्तन निर्देशनालय (ईडी)को टोलीले दिल्लीका मुख्यमन्त्री अरविन्द केजरीवाललाई पक्राउ गरेको छ । मुख्यमन्त्री केजरिवालले लागु गरेको मदिरानीतिको विषयमा सोधपुछका लागि भन्दै केजरिवाल निवास पुगेको ईडीको टोलिले उनलाई पक्राउ गरेको हो ।
केन्द्रीय वित्त मन्त्रालय, राजश्व विभाग मातहतको ईडीको जम्बो टोली बिहीबार मुख्यमन्त्रीको निवासमा पुगेको थियो । सोधपुछमात्र भन्दै केजरिवाल निवास पसेको टोलिले दुई घण्टा लामो सोधपुछपछि उनलाई पक्राउ गरेको बताइएको छ ।
सम्भवत भारतमा बहालवाला मुख्यमन्त्री पक्राउ परेको यो नै पहिलो घटना बनेको भारतीय सञ्चारमाध्यमहरुले लेखेका छन् । दिल्ली सरकारको एकजना मन्त्री एवं आम आदमी पार्टीकी नेता आतिशीले केजरीवालको गिरफ्तारीलाई सत्तारुढ बीजेपी र प्रधानमन्त्री नरेन्द्र मोदीको राजनीतिक षड्यन्त्र भएको प्रतिक्रिया दिएकी छन् । केजरिवालको आम आदमी पार्टीले केजरिवालले जेलबाट नै सरकार संचालन गर्ने जनाएको छ ।
दिल्लीको मदिरा नीतिलाई लिएर ईडीले केजरीवालमाथि छानबिन गर्दै आएको थियो ।
प्रतिक्रिया